Sorkarin a hnathawkte hlawh July thla a pûksak leh dawn
Mizoram sorkar chuan a hnathawkte July thla hlawh a pûk leh dawn a, chumi hnua pûk chhunzawm zel a nih dawn leh dawn loh chu sum dinhmun azirin ngaihtuah ṭhat leh a ni dawn.
Council of Ministers thutlukna angin Mizoram sorkar chuan sum dinhmun a ṭhat loh avangin sorkar hnathawkte June thla hlawh a pûksak tawh a, July thla hlawh pawh a pûksak leh dawn. Council of Ministers chuan, sorkar hnathawkte hlawh hi thla thum chhung pûksak turin thutlukna a lo siam tawh a ni.
Vanglaini palai zawhna chhangin Finance department hotute chuan, "July thla hlawh chu pûk leh phawt turin ruahmanna siam a ni. Kan pûk chhunzawm zel dawn em tih chu sum dinhmun azira ngaihtuah leh tur a ni ang," an ti.
Finance department hotute chuan, sorkar hnathawk sum pûk chu head hrana dah chi a nih loh thu leh dah tur pawh a awm loh thu sawiin, "Pawisa neih loh avangin sorkar hnathawkte hi hlawh kan pe kim lo a ni," an ti a; pek tur a awm loh avanga bá an nih avangin head hrana dah tur a awm loh thu an sawi.
Hlawh pûkte hmanna chungchanga zawhna awm ṭhin chungchangah Finance department hotute chuan, "Pêk tur a awm loh avanga bat ṭhensak kan nih avangin, hman tur a awm lo hrim hrim. Chuvangin, hlawh pûk hi a hmanna tur a awm lo," an ti.
Tarlan tawh ṭhin angin, Council of Minister remtihnain Finance department chuan sorkar hnathawkte hlawh chu June-August chhung pûk turin thutlukna an siam a ni.Mizoram sorkar chuan, Covid-19 vanga sum dinhmun harsat avangin sorkar hnathawkte hlawh pûk a remti a, sum dinhmun ṭhat hunah instalment-in, a pung awm loin a rûl dawn a ni. Hlawh puksak hian Rs. 40,000 aia tlem hlawhte leh Health leh Police department-a group-B leh a hnuai lamte a huam lo.