Hnam Chhantu Pawl bultumin Mizoram hmalam hun sawiho

Hnam Chhantu Pawl chuan, Inrinni khan Upper Republic-a an pisaah tun leh nakin zel dinhmun tur sawihona an buatsaih a, sâwm bik eng emaw zat an tel.

Hnam Chhantu Pawl president R Rahmangaiha chuan, tunlaia Mizorama thil thleng meka Chakma chungchang chu ram leh hnam tana thil pawimawh leh lian a nih thu a sawi a, "MNF-in zalenna a sual tih lohah chuan Mizo­rama thil thleng lian ber nia ngaih a nih avangin sawihona hun hi buatsaih a ni," a ti.

Central YMA presi­dent Lalbiakzuala chuan, tuna ram dinhmunin naktuk dinhmun tur a hril avangin ngaihtuahna hman fimkhur a ṭul thu sawiin, "Ram leh hnam tana ṭha tur tihhlawhtlin kawngah politics-a ngaih­dan inan lohna leh kohhran thurin inan lohnain harsatna siam lo se kan duh," a ti a; Chakma chungchang bakah, Mizoramin eng harsatna nge a tawh mek tih bihchian a ngaih thu a sawi.

CYMA President chuan, Joint NGO-in mi­nis­ter of state Dr BD Chak­ma báng tura an phût chhan sawiin, Chakma a nih vang hrim hrim ni loin, ram danpui hnuaiah rinawm taka khua leh tui ṭha ni tura intiam chunga ram danpui kalha thil a tih vang a ni. A bàn loh chuan a bàn ngei theih nan na zawka nawr zui a ni ang," a ti.

Sawihonaah hian mi hrang hrangin thu an sawi a, Nagaland CM adviser Lalthara thuziah zirho a ni bawk.

Sawihonaa kal khawm­te hian Citizenship (Amendment) Bill, 2016 zir chiang tur Core Committee an din nghal a, member turte an inruat leh dawn a ni.