Damlo phai lama thawn zingah Zûk leh hmuam ti 80% an awm

Mizoram State Tobacco Control Society (MSTCS) chuan, natna hrang hrang vanga Mizoram páwna inenkawl tura damlo thawnte an zir chiannaah, damlo refer zinga 80% chuan vaihlo zûk leh hmuam an ti ṭhin tih an hmuh chhuah thu an tarlang.

MSTCS tarlan danin, Mizoram sorkar hnuaia phaia inenkawl tura damlo, April 26, 2017 aṭanga August 16, 2017 chhunga thawn mi 59-te thu an zawh fiahnaah, cancer natna vanga refer zinga 80% chuan zuk leh hmuam an ti ṭhin tih an sawi.

Mi 59 zingah vaihlo zûk leh hmuam ti ṭhin 59.32% an awm a; mei zu ṭhin 35.59% leh hmuam ṭhin 23.72% an awm.

Damlo 59 zinga 45.76% chu zuk leh hmuamin natna a thlen theih natna vanga thawn an ni a, 25.42% chu cancer vei an ni. Cancer vei zinga 80% chu vaihlo zûk leh hmuam ti ṭhin an ni a; zuk leh hmuam ti lo 20% an awm bawk.

MSTCS chuan, damlo phaia thawnte chu an zir chian mek zel thu an sawi a; vaihlo zûk leh hmuam laka inthiar fihlim tur leh nunphung hrisel uar deuh deuh tura inzirtir uar lehzual a pawimawh thu an tarlang.