MNF-in Fûrpui Campaign an nei

MNF party chuan August 19, Inrinni khan Aizawl veng hrang hrang - Zemabawk, Ramhlun, Chanmari, New Market, Tennis Court, Thakthing, Khatla, Vaivakawn leh Ramrikawnahte Fûrpui Campaign hun an hmang a; MNF hruaitute’n thu an sawi.

Khatla kâwna campaign-a thu sawitu K Sangṭhuama, MLA chuan, sorkar tihdik lohte sawisel ngawr ngawr an tum lo tih sawiin, “Sorkar a insiamṭhat beiseiin sorkar tih dik loh kan sawi zawk ṭhin. Vawiin thlenga insiamṭhatna hmuh tur a awm loh avangin khawlaiah mipuite’n min hriatpui tura puanzar a lo ngai ta a ni,” a ti.

NLUP chu CAG-in an endik a, a hlawh­tlinna an hmu lo a, a hlawhchham a ni tih an report-ah an tarlang tih sawiin K Sangṭhuama chuan, “NLUP dawng zingah dawng ve âwm lo, khawsa thei tak tak mi 1,400-in an dawng tel ve tih an hmuchhuak a, CAG report hi thudik tak a ni,” a ti a; Congress party sorkar chu CAG report dâwt anga sawi phêt lo turin a chah.

Zemabawka campaign-ah Lalruatkima, MLA-in thu sawiin, Congress mi leh sate’n MPF office an kal chilh chu pawi a tih thu a sawi a, “Miin thu dik an sawi vanga ná kan ti zel dawn a nih chuan inenfiah hle kan ngai tihna a ni,” a ti. Chief Minister-in, ‘Kan party mi ni lo chu eng atan mah ka ti lo,’ tia a sawi chuan Congress rilru puthmang a tichiang hle tih sawiin, “Congress sorkar hian mipui a huapzo thlawt lo a, lalchhungkua leh party mi leh sa inlulinna leh invulhna sorkar a ni,” a ti bawk.

Lalrinawma, MLA chuan Tennis Court bula campaign-ah thu sawiin, sorkarin kawng chhia tihngaihna a hre lo niin a sawi a, “Kum 2015 khan Assembly House-ah kawngpui siam ṭhat chungchangah resolution kan pu lut a, hnâwl a ni. Kan kawngpui a chhe zel a, kalphung thar a ngai a, chumi tur chuan MNF kan inbuatsaih mek a ni,” a ti.