Faina pualin lem inziahsiak buatsaih

Central YMA, Lunglei sub-headquarters YMA leh North East Initiative Development Agency (NEIDA)-te chuan, Inrinni khan faina inzirtirna atan JB College-ah ‘On the spot Painting Competition’ an buatsaih. Inelnaah hian sikul leh college zirlai 121 an tel a, thupui chu ‘Khawlai fai, lui dung fai leh in leh a vel fai’ tih a ni.

Intihsiaknaah hian C Lalruatpuia, Mizoram Polytechnic chu pakhatna a ni a; R Lalchhanchhuaha, D&D English School chu pahnihna niin, Lalduhsangi, Lunglei HSS chu pathumna a ni.

Pakhatnain Rs. 5,000, pahnihnain Rs. 3,000 leh pathumnain Rs. 2,000 an dawng a; mi dang 10 hnenah consolation prize Rs. 500 ṭheuh pek a ni. Intihsiaka tel zawng zawngte hnenah water colour, crayon leh lemziahna hmanrua an pe vek bawk.

Intihsiak hawnna inkhawmah YMA sub-hqrs, Lunglei president R Lalnunthara chuan, faina chu zirlai nih lai aṭanga nuna tuh ngheh chi a nih thu sawiin, zirlai nih lai aṭanga ṭan lak loh chuan a pawi hman tawh ṭhin tih a sawi.