Mizorama Covid-19 vei Civil mi 199, sipai 118

Mizorama Covid-19 hripui kai hmuh chhuah tawh mi 317 zinga 199 (62.77%) chu civil mi an ni a, mi 118 (37.22%) chu sipai mi leh sa an ni.

Mizorama sipai, Covid-19 vei hmuh chhuah tawhte chu Aizawl district-a awm 98, Lunglei district-a mi 18 leh Serchhip district-a mi pahnih an ni. National Disaster Response Force (NDRF) mi 32, Assam Rifles-a mi 49, Border Security Force (BSF)-a mi 36 an ni a; NDRF leh AR mite hi Aizawl district-a mi vek an nih laiin, BSF-te chu Aizawl (16), Lunglei (18) leh Serchhip (2) district-a mite an ni. Mizo sipai Assam Regiment-a awm, tun hnaia Jammu & Kashmir aṭanga rawn haw pakhat a awm bawk.

Sorkar thuchhuah aṭanga a lan danin, Covid-19 vei zinga dam tawh mi 11 chu nimin khan chhuahtir an ni a, Lungverha NDRF mi 10 leh Assam Rifles mi pakhat an ni. BSF sipai zinga mi 12, Lunglei district-a mite'n hripui an vei tawh lo (negative tawh) tih hmuh finfiah a ni tawh bawk a, chhuahtir erawh an la awm lo.