Bolero leh hmanrua Sorkarin CYMA a pe

Disaster Management & Re­habilition (DMR) minister Lal­cham­liana chuan nimin khan Secretariat tualah Mizoram sorkar aiawhin Bole­ro camper pakhat leh rîkrum thila chhan­chhuahna hmanrua (rescue equipment) eng emaw zat Central YMA hnenah a hlân.

Lalchamliana chuan, CYMA chu rîkrum thila Mizo mipui kut leh kê, thâ leh zung, chhiatni ṭhatnia Mizo mipui tuamhlâwmtu a nih thu a sawi a, "Mizo khawtlang tan YMA pawimawhna a tàwp thei ngai dawn lo. YMA leh sorkar chu pheikhai rual takin kawng tinréngah an thawkho ṭhin a, ramin harsatna chi hrang hrang a hmachhawn mekah pawh YMA hi pawl ṭangkai leh thawh hlâwk a ni," a ti.

CYMA president Vanlalruata chuan, "Rîkrum thila chêt chhuahpui tur, mi bo leh tui tla zawn nan YMA chuan hmanrua a neih ṭhat tâwk loh vanga sorkara dilna a thlente ngai pawimawha hmanrua eng emaw zat pek kan ni hi a lawmawm hle a ni," a ti a; motor leh hmanruate chu a ṭulna hmun takah ṭang­kai taka hman a nih tur thu a sawi.

Mizoram sorkarin CYMA hnena hmanrua a pekte chu - hruihzén meter 50-a sei hlûm (coil) hnih, pulley pahnih, full body harness pahnih, carabineer pathum, figure of 8 pathum, ground sheet panga, stretcher pakhat, pelican search light pakhat leh raincoat 30 a ni.