Covid-19 vei mi 20 hmuh belh Niminah mi 11 chhuahtir an ni

July 21, Thawhlehni khan Mizoramah Covid-19 vei mi 20 hmuh chhuah belh a ni a, hripui vei dam tawh mi 11 chhuahtir an ni thung.

Mizorama Covid-19 vei hmuh tawh zawng zawng mi 317 zinga mi 126-in an la vei mek a, mi 191-in an vei tawh lo (negative tawh) a, mi 179 an chhuak tawh. Thawhlehnia Aizawl, Serchhip leh Hnahthial aṭanga swab sample dawn Zoram Medical College laboratory-a endik mipa 231 leh hmeichhia 48 zingah mi 261-in hripui an vei lo a, mi 18-in an vei tih hmuh a ni. Lunglei Civil Hospital (LCH) laboratory-a mi 27-te sample endikah hripui vei mi pahnih hmuh chhuah a ni bawk.

Nimin khan NDRF mi 10 leh Assam Rifles sipai pakhat, Covid care Centre (CCC) - Berawtlanga enkawlte chu chhuahtir an ni. Berawtlanga CCC-ah hian nimin khan mi 18 dah luh niin, chu'ngte nen chuan mi 31 (hnam dang vek) an awm mek. Sorkar thuchhuah tarlan danin, ZMC-a Covid-19 vei hmuh tharte hi Aizawl district-a mi, mipa vek, kum 23-59 inkar an ni a; mi 16 chu Assam Rifles sipai, Zokhawsanga khung hran lai niin, Assam mi 13, Delhi lam mi pahnih leh Mizo pakhat an ni. Pakhat chu Assam aṭanga rawn lut National Defence Response Force (NDRF) mi sipai, Lungverha awm a ni a; pakhat dang chu Assam aṭanga rawn lut tho, civil mi a ni.

July 21-a LCH laboratory-a True­NAT hmanga mi 27-te swab sample endikah Covid-19 vei mi pahnih hmuh thar a ni a, BSF sipai ve ve, kum 57 leh kum 53 mi, Uttar Pradesh leh Uttarakhand aṭanga rawn let an ni. July 1, 2020-a Mizoram an thlen aṭangin khung hran nghal an nih thu sorkar thuchhuah­in a tarlang. Thawhlehnia LCH-a sample endik zingah Covid-19 vei vanga Covid Care Centre (CCC) - SIRD, Pukpuia enkawl mek mi 10 an tel a, an zinga panga chuan hripui an la vei a ni. Endik nawnna ni lote pawh BSF sipai, quarantine faci­lity - JNV, Pukpuia awm lai vek an ni.

Mizorama Covid-19 kai hmuh chhuah tawh chu mi 317 an ni a, chu'ng zinga mi 126 chuan hripui vei (positive) mekin, mi 191-in an vei tawh lo (negative tawh). Mi 179 chhuahtir an ni tawh a, negative tawh, la chhuahtir loh mi 12 awmin, Lunglei district-a BSF mi leh sa vek an ni. Civil mi 199 zinga 168 chu dam takin an chhuak tawh a, mi 31 an la chhuak lo thung.