Sorkarin ZMC-a doctor Insawifiah turin a hriattir
State Referral Hospital (ZMC)-a thawk doctor pakhatin Covid-19 a vei tih July 20, Thawhṭannia hmuh chhuah a nih hnuah Health & Family Welfare (HFW) department hotute'n chak takin hma an la zui nghal niin sorkar thuchhuah chuan a tarlang. Health department chuan, SRH-ZMC doctor chu dan a bawhchhia nia a lan avangin insawifiah turin a hriattir.
SRH-ZMC-a doctor pakhat, Covid-19 vei hmuh chhuah tharin inkaihhruaina dan a bawhchhiaa a lan avangin Mizoram sorkar chuan insawifiah tura hriattirna (show cause notice) a pe a, July 27, 2020 ral hma ngeia insawifiah tura tih a ni. SRH-a doctor pakhatin Covid-19 a vei chungchangah hian nimin khan Health secretary H Lalengmawia leh principal director Dr F Lallianhlira chuan SRH-ZMC hotute meeting an neihpui. Meeting kaltlang hian SRH-ZMC thawktute chu inrêlbàwlna leh inkaihhruaina dante khauh taka zâwm tura hriattir an ni.
Health Secretary chuan, sorkarin Covid-19 kaihhnawihah inkaihhruaina (guidelines) a siam thu leh Ordinance mumal taka a siam thu a sawi a; a bik takin doctor leh medical lam mite chu inkaihhruainate zâwm a, mipui tan entawn tlak ni tura beisei an nih thu sawiin, "Chutih laia doctor pakhat a lo fimkhur tâwk lo hi sorkar chuan pawi a tiin a la thutak hle a ni," a ti. Covid-19 veite enkawlna damdawi-ina thawk doctor pakhatin hripui a vei tih hriat a nih veleh sorkarin rang takin a chhui zui nghal tih tarlangin sorkar thuchhuah chuan, "A ṭul anga chak taka bawhzui nghal a nih avangin mipui tan chî-âina tur a awm lo tih Health Department chuan a sawi. Hripui laka mi tin kan him tlàn theihna turin sorkarin inkaihhruaina dan a siam te, tih tur leh tih loh tur Health department-in mipui a kawhhmuh zawng zawngte zâwm kim a, fimkhur turin mipui a hriattir nawn leh a ni," a ti.