Financial year 2020-21 ah Central aṭanga sum hmuh a tlahniam ; Leiba cheng vbc. 1,202.83-in a pung
Mizoram sorkarin kum 2020-21 chhunga sorkar laipui aṭanga sum a hmuh chu a hma kum, 2019-20 aiin cheng vbc. 1,917.59-in a tlem zawk. Hetih lai hian, kum 2020-21 chhung vêkin kum hmasa aiin leibá cheng vbc. 1,202.83-in a pung.
Finance enkawltu Chief Minister-in nimina Assembly House-a a pharh, State Finance Audit Report of the Comptroller and Auditor General (CAG) of India for the year ended March 31, 2021-a tarlan danin, kum 2020-21 chhunga revenue receipts chu cheng vbc. 7,740.67 a ni a, kum 2019-20 chhunga hmuh aiin cheng vbc. 1,917.59 (11.41%)-in a tlem zawk.
Kum 2020-21 chhungin sorkar laipui aṭanga sum hmuhna hnár lian - grants in aid leh share of central taxes aṭanga sum hmuhte chu kum hmasa 2019-20 chhunga hmuh aiin a tlem ve ve a; grants in aid cheng vbc. 1,866.33 (36.64%) leh share of central taxes 7.25 (0.24%)-in a tlahniam a ni.
State sorkarin chhiah a lâk khawm (State Own Tax Revenue) pawh a tlahniam a, kum hmasa aiin cheng vbc. 83.42 (11.41%)-in a tlem zawk. Hetih lai hian, state sorkarin chhiah ni chiah lo aṭanga sum a hmuh (State Own Non Tax Revenue) chu kum hmasa aiin cheng vbc. 39.41 (7.54%)-in a tam thung.
Kum 2020-21 ah hian sorkar hnathawk hlawh, sorkar hnathawk medical reimbursement, pension hlawh, sorkar inrêlbàwlna leh revenue expenditure dang atan budget aṭanga sum hman zawng zawng aṭangin cheng vbc. 8,514.80 (88.29%) hman a ni a; hmasawnna hnathawhna (capital expenditure) atan chuan cheng vbc. 1,125,97 hman a ni.
Kum 2019-20 tawpa Mizoram sorkar leibá chu cheng vbc. 8,678.26 a ni a, kum 2020-21 ah chuan leiba cheng vbc. 9,881.09 a tling chho. Hetih lai hian, GSDP aṭanga chhûta leiba zat chu kum 2019-20 ah 34.51% a ni a, kum 2020-21 ah chuan 33.98%-ah a tlahniam thung.