VC/LC by-election-ah MNF-in seat an la tam ber

September 6, 2022-a Mizoram hmun hrang hranga village/local council by-election-a vote tlate chu Thawhlehni zan khan chhiar nghal a ni a, state sorkara rorel lai MNF party-in seat an la tam ber.

Thawhlehni, Septem­ber 6 vêka by-elec­tion neihna tura tih, Keifang Venglai leh Hmawngbuchhuahah erawh chuan inthlan a ni lo.

Saitual district-a Keifang Venglaiah hian court-ah thubuai a awm avangin September 5, 2022 khan inthlan ṭhulh a nih thu puan a ni a; Lawngtlai district-a Hmawng­bu­chhuahah chuan chuh tuma hming pete pawm an ni lo vek thung.

By-election hi VC/LC 33-ah neih a ni a, chu'ng zinga 18-ah chuan MNF party an chak. VC/LC parukah Indian National Congress (INC) chakin, VC/LC pangaah ZPM an chak a, VC/LC pahnihah BJP chakin, independent candidate-te chakna VC pahnih a awm bawk.

Aizawla Leitan Ram­thar leh Zemabawk South-te chu local council din thar a ni a, chu vang chuan LC inthlan buat­saih a ni. Khawtlang thutlukna angin party dangte'n candidate siam loin, MNF chiahin candidate an dah a, MNF candidate-te chu inthlan ngai loin tlinga puan an ni.

Siaha khawpuia Siaha Vaihpi Bazar pawh VC ding thar niin, inthlan an hmachhawn vawi khatna a ni a; political party-te'n candidate an siam lo a, khawtlang hruai tura mipuiin an duh mi pangate'n independent-in hming an pe lut a, chuhtu dang awm loin tlinga puan an ni bawk.

Hetih lai hian, Tual­bungah chuan INC leh party dangte'n candidate siam loin MNF candidate an thláwp a, ZPM an mal din nia thu dawn a ni.