Sakramen atan grape wine hmang turin BCM leh CGGS-in inremna an ziak thar

Baptist Church of Mizoram (BCM) leh Champhai Grape Growers Society (CGGS) chuan September 6, Thawhlehni khan Winery Packing Hall, Champhai Winery, Tlangsamah inremna thuthlung an ziak a; Champhaia grape wine siamte Baptist kohhranin sakramen uain atan an hmang zel dawn.

Inremna thuthlungah hian BCM aiawhin general secretary Rev. R Lalbiakliana'n hming a ziak a, CGGS aiawhin chairman HS Vanlalfakzuala'n hming a ziak. Hriatpuitu atan kohhran lam mi pahnih bakah, Horticulture Joint Director leh Champhai SP-te'n hming an ziak bawk.

Thuthlung ziah tharna inkhawm hi CGGS Chairman-in a kaihruai a, bialtu pastor Rev. PC Lalropuia'n hunserh a hmang. Champhai bawrhsap James Lalrinchhana'n hmanpuiin thu a sawi.

BCM leh CGGS-te'n thuthlung an ziah hi kum hnih chhung atan a ni a, thil chi hrang hrang 11 tarlan a ni. Inremna ang chuan, sakramen atana hman tur wine chu a bik taka siam tur a ni a, mihring hriselna atana ṭha lo thil a awm tur a ni lo. BCM leh CGGS remtih dunna tel lo chuan a úm, a rawng, acid tam lam, a rim leh a tui dan (taste)-te tihdanglam loh tur a ni bawk.

Sakramen atana hman tur uain chu úm khat mililitre 750 a ni a, Rs 140 man a ni. Excise duty, road transport leh permit-te chu BCM-in an buaipui dawn a ni.

Champhaia grape wine siam chu sakramen uain atana hman turin a ṭhat leh ṭhat loh zir chiang a, vawi tam tak enho a nih hnuah BCM Administrative Committee chuan kum 2014 khan a pawm a; a hnuah Assembly Executive Committee leh BCM Assembly-ahte pawm zui leh a ni.

November 11, 2016-ah BCM leh CGGS chuan inremna an ziak a, kum 2016 aṭangin sakramen atan CGGS siam wine an hmang ṭan. Inremna thuthlung ziah hmasak berin a huam chin a tàwp hma, October 5, 2019 khan inremna thuthlung an ziak leh bawk.

Thu dawn danin, Mizoram (Liquor Prohibition) Act, 2019-ah alcohol tel wine khap a nih avang leh Champhaia grape wine siam Aizawla zawrhte man a nih avangin BCM chuan sakramen atana CGGS siam wine a hman tur a khaihlak hlek hman a; mahse, Mizoram Cabinet-in Mizorama thar grape hmanga wine siam a phal leh tâk avangin BCM leh CGGS chuan inremna an ziak thar leh ta a ni.