Lungleiah sipai tana kaihhruaina siam

Lungleia MLA pahnih - Lawmawma Tochhawng leh Dr K Pachhunga te chuan July 21, Thawhlehni khan Assam Rifles, Border Security Force leh Indian Air Force hotute Lunglei DC conference hall-ah an kâwm a; sipai zinga Covid-19 vei chungchang sawipuiin, Standard Ope­ra­ting Procedure (SOP) for Military and Paramilitary Forces duan thar chu hriattirin an pe nghal.

Inkawmhonaah hian 1st Assam Rifles, 60 Bn BSF (Serchhip Dawng­zawl), 61 Bn BSF (Lunglei Zotlang), 131 Bn BSF (Melte, Lunglei district) leh IAF 42 WEU(C) (Lunglei Pukpui) hotute an tel a; Lunglei DC V Lal­sangliana, SP Stephen Lalrinawma, chief medical officer Dr Thani Pachuau, official dangte leh YMA Sub-Hqrs hruai­tute an tel bawk. Bamboo Development Board vice chairman Dr K Pachhunga chuan, sipai zingah Covid-19 vei hmuh chhuah an awm belh zel chu pawi a tih thu a sawi a; sipai zingah hripui vei an awm belh zel loh nan leh sipaite'n mipui náwlpuiah an kài darh lohna turin sipai commandant-te chu an battalion-ah ṭheuh fimkhur zual turin a hrilh. Dr K Pachhunga chuan, sipai hotute chu inthununna khauh lehzuala kengkawh tur leh, sipaite chu Covid-19 chungchang chiang taka hriattir turin a hrilh a; an hmalaknate leh dinhmunte DC-ah chipchiar taka hriattir ṭhin turin a chah bawk.

Lunglei SP Stephen Lalrinawm­a chuan, tun dinhmuna Mizorama Covid-19 vei mek zinga a tam zawk, 76.74% chu sipai mi leh sa an nih thu sawiin, BSF mi leh sate Covid-19 an inkài darh avangin Lunglei Police Station-ah FIR thehluh a awm tawh thu a sawi a, "The Mizoram Containment and Prevention of Covid-19 Ordinance, 2020 behchhana action la turin police lamin hma kan lak ngei a ngai dawn a ni," a ti. Meeting-ah hian, Lunglei district-a sipai la luh belh tur chung­chang te, quarantine kalpui mek dan leh chhunzawm zel dan tur te, Lungleia Health department-te nen hmalakho dan turte leh sipaite zawm tur kaihhruaina SOP for Military and Paramilitary Forces chungchangte sawiho a ni.

131 BSF commandant KS Nautiyal chuan, tun aṭanga thla hnih chhungin state páwn aṭangin Mizoramah sipai 800 luh belh tur an awm a, chu'ng zinga mi 300 vel chu Lunglei district-a awm tur an nih thu a sawi a; sipai la rawn lut turte chu khung hrang turin BSF hmunhma neihte'n a dâwl zawh dawn loh avangin quarantine faci­lity ruahmanpui turin sorkar hotute a ngen. Lunglei DC V Lalsangliana chuan, sipai rawn lut tharte khung hran nan sorkarin quarantine facility pahnih - JNV, Pukpui leh Sazaikawn Multipurpose Indoor Hall ruahman theih a nih thu a hrilh.

1st Assam Rifles hotu Maj. Ramandeep Makkar chuan, tun aṭanga thla hnih chhungin AR sipai 30 aia tam lo an rawn luh an beisei thu a sawi a; AR mi leh sate chu Zokhawsanga an quarantine centre-ah ni 21 chhung khung hran zel an ni a, Mizoram Health department kaltlangin swab test tih ṭhin a nih thu a sawi. Indian Air Force hotute pawhin, sipai 30 aia tam lo Mizorama rawn lut thar tur an beisei thu leh, an battalion headquarters-ah an khung hran ṭhin thu an sawi a ni.

 Sipai tana kaihhruaina tlangpui

•    Sipai leh an chhungte Lunglei district-a lut tur an awm chuan Commandant/Officer-in-Charge-in DC leh CMO-te a hriattir lâwk ngei tur a ni.

•    Sipai lo lutte chu DC-in a pawm sa quarantine centre-ah chauh khung hran tur.

•    Commandant/OC-te'n CMO nen inráwnin swab sample laka endik a ni ang.

•    Khung hrante hriselna dinhmun chu an awmna battalion medical officer-te'n uluk takin an vil tur a ni.

•    Khung hrante nihna kimchang -  hming, kum, address, phone number-te e-mail - lungleidc@gmail.com ah thawn zel tur.

•    Khung hrante chu mCOVID-19 leh Aarogya Setu mobile application-ah in register vek tur a ni.

•    Ni 14 chhung khung hran tawh, swab test result negative bawkte chu quarantine aṭanga chhuahtir theih a ni ang. MO-in completion certificate a pek hnuah chauh chhuahtir tur.

•    Quarantine aṭanga an chhuah hnuah ni 7 dang fimkhur taka awm a, mahni battalion headquarters chhuahsan loh tur.

•    Sipaite chu loh theih loh thilah chauh vantlang hmunah an kal tur a ni.

•    Lunglei district-ah Covid-19 vei vanga enkawl mek mi 16 an awm a, BSF mi leh sa vek an ni (July 21-a hmuh chhuah nen mi 18).