PC acting president Vanlalruata

Peoples' Conference party office bearer-te nimina ṭhukhawm chuan PC party acting president atan senior vice president ni lai Vanlalruata an ruat. President ni lai Lalhmangaiha Sailo chuan a nihna September 5, 2022 khan a lo bànsan tawh a ni.

PC party thuchhuah chuan, nimin khan an party pisaah senior vice president Vanlalruata kaihhruaiin office bearer-te an ṭhukhawm tih a tarlang a, "Kan president Pu Lalhmangaiha Sailo-in ṭhalai zawk tan a nihna a ken tâk avangin lungrual takin acting p;resident atan Pu Vanlalruata, senior vice president kan ruat," a ti.

Vanlalruata chuan, an president Lalhmangaiha Sailo-in a nihna a chawlhsan chungchangah zawhna tam tak an dawng tih sawiin, "Pu Lalhmangaiha'n a sawi tawh angin, kum upa lam leh taksa chak lo chho zel a nih avang te, ṭhalai zawkte kuta party hruai hna kentir a duh tawh avangte a ni ber," a ti a, chutiang rilru a pú chu a ngaisang a, a zah thu a sawi.

Vanlalruata chuan, "Kum 2023 MLA inthlanpui kan hmachhawn turah hian sorkarna fawng chelhtu pawimawh takah PC party mi leh sate thlenpui ngei ka tum," a ti a; ṭhahnemngai taka PC party leh ram tana hma la zel turin PC mite a chah.

Nimina PC party OB-te ṭhukhawm chuan, September 22, 2022-ah General Assembly neih an rêl a, chumi hunah chuan an party hotu tur an thlang dawn a ni.