ZPM hmasawnzia a lang - ZPM

ZPM party chuan thuchhuah siamin, September 6, 2022-a hmun hrang hranga village council leh local council by-election result-ah ZPM-in hma an sawnzia a lang niin an tarlang.

LC/VC by-election-ah hian ZPM-in seat 10 an chuh a, Ramthar North, Champhai Dinthar, Sialhâwk, Khanpui, Baktawngahte an chak tih sawiin ZPM chuan, "Candidate-te kan lawmpui tak zet. Keifang Venghlun leh Falkawnah pahnihna niin, Tualbungah beih rawnna karah vote 20-in kan chak zo lo a, hei hian ZPM hmasawnna nasa tak bakah, party dangte huphurh rawn a ni tih a tarlang chiang hle," an ti.

ZPM chuan, West Phulpui leh Rajiv Nagar-ah vaukhànna kara huaisen taka ZPM tana pên chhuak ngam candidate-te fakawm an tih thu sawiin, "Candidate tling zo ta lote hi kan tawrhpui rualin, nasa zawka ṭan la chungin, hun thar duhawm zawk a la her chhuak ang tih hi kan beiseina leh kan fuihna a ni," an ti a; by-election-a tling zawng zawng an lawmpui a, huaisen taka hna thawk turin duhsakna an hlan tih an sawi.

Khua leh veng eng emaw zatah by-election neih a ṭulna chhan leh khawtlang boruak thlirin, nun dan mawi lantir nan seat chuh loh ṭha an ti tih an sawi a, "He thutlukna avanga kan khingpui party-te min beih lêtna erawh pawi kan ti tak zet a ni," an ti.

ZPM party chuan, tluang taka by-election zawh a ni ta chu lawmawm leh inthlan buaipuitu official, khawtlang mipui leh veng hrang hranga ṭhahnemngai taka thawktu party mite chungah an lawm thu an tarlang bawk.