Congress hunlai aiin MNF hunah GST a lut tam zawk - RRRa

MNF adviser Robert Romawia Royte, minister of state chuan, Covid-19 vanga sum harsatna karah SEDP ṭanpuina sum mi tam tak bank account-ah a luh ṭan dawn mek thu a sawi a; Congress sorkar hunlai aiin MNF sorkar hnuah GST a lut tam tih sawiin hmasawnna a kal chak thu a sawi.

Robert Romawia Royte hian nimin khan Bethlehem Vengthlang YMA Hall-a MNF, Aizawl South-I Block-in 'Mi thar lawm luhna' an buatsaihah thu sawiin, hmasawnna hna thawk tam leh tam lo hre duh chu Taxation website-a lut mai tura chahin, "MNF term rei lo te chhung hian GST a tam. GST-a lo luh tam chuan hmasawnna hnathawh a tam a ni," a ti a; Congress sorkar lai aiin MNF sorkarah GST a lut tam zawk niin a sawi.

"Covid vangin sum kan dawn tur tam tak kan dawng thei lo. SEDP hi rethei leh harsa zawkte tan a inkhai fuh chho mek... Tunah hian SEDP hi mi tam tak account-ah a lut ṭan dawn mek a, la thlan ve loh mi tam tak kum tharah thlan an ni ang," a ti.

Robert Romawia Royte hian Aizawl South-I chhung veng hrang hrang aṭangin MNF-ah voter 485 a lâwm lut niin MNF thuchhuah chuan a tarlang.