MNF sorkar hnuah BADP sum Nuai 8,077.55 hmuh a ni tawh

Rural Development minister Lalruatkima chuan Congress Legislature Party (CLP) leader Zodintluanga Ralte zawhna chhángin, kum 2019 hnu lamah Border Area Development Programme (BADP) atan Mizoram sorkarin cheng nuai 8,077.55 a hmuh tawh thu Assembly House a hrilh.

Zodintluanga Ralte chuan, BADP hnuaia hnate chu detailed project report (DPR) siamin, PWD Scheduled of Rate hman a nih thu a sawi a, "Contractor hlawh tur a tel vek. BADP hna reng reng hi BDO, directorate EE thawh tih a ni vek. Pawisa hlêp hi khawiah nge a awm? Mr 25% tihte official-ah a lâr a, 25% chuan hna a thawh ṭhat theih loh, titlem rawh tih sawite hi a dik em?" a ti.

RD Minister chuan, Zodintluanga chu a rinthuah a chêng thui nia a hriat thu sawiin, "Deduct 15% for contractor profit dah thlap a ni. Rinthuin a kal thui deuh niin a lang. Dan ang thlapa kal a ni. BADP hian guideline fel tak a nei a, State Level Implementing Agency kalpui a ni. 25% deduction siam theih a ni lo," a ti a, 25% hman tur a awm loh thu a sawi.