Congress-in result ṭhaah an ngai

Congress party chuan thuchhuah siamin, ruling party leh party dangte'n thlêmna leh tawktarh chi tinreng an hmatheh kara VC/LC by-election-ah seat 16 an la chu result ṭha takah an ngaih thu leh, tun hnaia Congress party-in ram puma hma a sâwnzia tichiangtua an ngaih thu an tarlang.

MPCC chuan, VC leh LC by-election-ah Congress party-in seat 16 a lak bakah, Congress party thlàwp independent candidate pakhat thlan tlin a nih thu an tarlang a, "Aizawl khawpuia LC by-election-a ruling party MNF chak zo lo hian Pu Lalsawta kaihhruai Congress party mipuiin an rin tâwkzia a tilang chiang hle," an ti.

Congress party chuan, political party hrang hrang aiawha thlan tlinte duhsakna an hlàn tih sawiin, "Ram leh hnam, khawtlang tana nghet taka ding turin kan ngen a ni," an ti a; inthlanna thianghlim leh felfai buatsaihtu official te, Congress party candidate-te leh an candidate-te thlangtu mipuite chungah an lawm thu an tarlang bawk.