Hripui vei enkawl lai mi 319 an awm

September 6, Thawhlehni khan Mizoramah Covid-19 vei mi 64 hmuh chhuah a ni a, nimin khan hripui vei dam tawh mi 67 chhuahtir an ni. Niminah Covid-19 vanga thi an awm lo a, tlai lamah hripui vei enkawl lai mi 319 awmin, an tlem hret hret.

Thawhlehnia Covid-19 positive hmuh thar mi 64-te chu mipa 30 leh hmeichhia 34 an ni a, rapid antigen test hmanga hmuh chhuah vek a ni. Swab sample endik zat 462 aṭanga positive zat chu 13.85% a ni a; a záwnin ni kaw chhung positivity rate-in 20% a tling tawh lo.

IDSP record angin, Mizoramah Covid-19 vei 2,37,534 hmuh chhuah a ni tawh a, mipa 1,10,630 leh hmeichhia 1,26,904 an ni a, mipa aiin hmeichhia 16,274-in an tam zawk. Nimin tlai dar 5 thleng khan mi 2,36,493 (99.56%) chhuahtir an ni tawh a, mi 722 (0.30%) thi tawhin, enkawl mek mi 319 (0.14%) an awm.

Kum 2011 chhiarpui angin, Covid-19 vei hmuh tawh 2,37,534 chu state mipui zat aṭangin 21.65% a tling a, India rama state zingah a sang ber. Mi 1,000 zelah positive 216 an awm tawh ang a ni a, hripui vangin mi 1,00,000 zelah mi 65 an thi tawh ang a ni bawk.