KHAWTHLIR

Thisen pe
Johnson College NSS chuan nimin khan an college-ah thisen pek an huaihawt a, Civil Hospital, Aizawl tan thisen unit 126 an pe a, petute mipa 107 leh hmeichhia 19 an ni.

SA Field Session
Salvation Army, India Eastern Territory chuan September 3-6, 2022 chhung khan Aizawl Temple Corps-ah SAY IET chhunga officer thawk laite leh chàwl tawhte intawhkhawmna hun, Field Session 2022 an buatsaih a, officer 322 an tel. Thupui chu 'Thlarau thianghlima siam thar lehna' tih a ni a; Pathian thuchah an ngaihthlak bakah, rawngbawlna chanchinte an sawiho a ni.

Board siam rem
Mizoram sorkar chuan August 11, 2022-a SEDP hnuaia Manpower Development Board member a ruatte chu nimin khan tihdanglam a nih thu a tarlang. Chairman atan LESDE minister Lalchhandama Ralte, vice chairman atan Zothantluanga, MLA, secretary atan LESDE secretary leh member atan mi 13 ruat thar a ni.

Fortified rice
Food, Civil Supplies & Consumer Affairs department chuan, sorkar laipui ruahman angin April 1, 2023 aṭangin Mizoram pumah Antyodaya Anna Yojana (AAY) leh Priority Household (PHH) chhungkaw tan buhfai hrisel (fortified rice) sem a nih dawn thu nimin khan a tarlang.

Kuhva rah man
Saitual police-te chuan September 6, Thawhlehni khan Keifangah truck pakhat aṭangin Myanmar aṭanga lak luh nia hriat kuhva rah ip 120 an man a, lirthei enkawltu Lalenkawla (36) s/o Romawia (L), New Champhai an man bawk. Kuhva hi Zokhawthar aṭanga phurh a ni a; kg. 9,600 niin, Rs 7,80,000 man a ni.

Lungphûm 48
Sports & Youth Services (SYS) minister Robert Romawia Royte chuan ZPM member C Lalsawivunga zawhna ziaka chhángin, sorkar term kal mek chhungin SYS hnuaiah hmun 48-ah lungphùm phùm a nih tawh thu a tarlang a, "Hna pakhat zawh tawh a ni a, hnathawh kal mek 47 a awm. Lungphùm phùm tawhna hna la thawh miah lohna pakhat Republic Vengthlangah a awm," a ti.