Minister Dr BD Chakma a bang Chief Minister hnenah banna a thehlut

Minister of state Dr Buddha Dhan Chakma chuan nimin khan Chief Minister hnenah minister aṭanga bànna a thehlut. Chief minister Lal Thanhawla chuan, Dr BD Chakma bànna a pawm dawn leh dawn lo a la sawi theih loh thu Vanglaini palai a hrilh.

Dr BD Chakma hian nimin chawhma dar 11:15 khan minister aṭanga a bànna a thehlut a, Chief Minister aiawhin a Personal Secre­tary-in a dawng. Dr BD Chakma bànna thehluh chungchang hi Chief Minister-in a ngaihtuah ang a, a thurâwn angin Governor-in thutlukna a tichhuak dawn a ni.

A bànna lehkhaah hian Dr BD Chakma chuan, National Eligi­bility cum Entrance Test (NEET) kaltlangin Chakma zirlai palite chu Mizoram quota-a MBBS zir tura an tlin thu a tarlang a, "Counselling pawh neihpui vek an ni tawh a, mahse, counselling ni vêkah chhan mumal awm loin Higher & Technical Education (HTE) Secretary-in counselling neih tawh a cancell a, a thara neih ṭhat leh turin a ti a ni," a ti.

Dr BD Chakma chuan, July 26, 2017-a HTE Minister-in press statement a tihchhuahah, Mizo­ramin MBBS quota a neihte chu 'Zo ethnic People of Mizoram' tan chauh dah a nih thu a tarlan thu ziakin, "Minister press statement aṭang hian Zo ethnic ni lote chu MBBS seat pek an ni dawn lo tih a lang chiang a ni," a ti a; Chakma zirlai tling ngeite MBBS seat pek an ni lo tur chu a pawm theih loh thu a sawi.

Mipui thlan tlin a nih ang ngeiin minister of state a nih angin state chhunga mipuite hnam leh sakhuaa an nihna en hrang lo a, mipuite ang khata en chu a tih tura a ngaih thu sawiin BD Chakma chuan, "Minister of state ka nihna anga ka tih tur ka tihnaah pawisawi lo mi tam tak rilru ka tihnat avangin pawi ka ti tak zet a ni," a ti.

Dr BD Chakma chuan Chief Minister hnenah hian a ministry-a minister of state a nih reng chuan democracy ropuina Mizoramah vawnhim a nih reng theih loh a hlauh thu sawiin, "I kaihhruaina hnuaiah hian hnam leh sakhua thliar hrang lo a, kan in anga mipuite kan chen theih ka duh. Ngun tak ka ngaihtuah hnuin bànna hi ka rawn thehlut a ni," a ti a; a bànna chu pawm ngei tur CM a ngen.

NGO Coordination Committee chuan Dr BD Chakma hi India Constitution hnuaia a tih tur ti lo leh a tih loh tawp tur tihah puhin, July 27, 2017 khan minister of state a nihna aṭanga bàn tura ngenna Chief Minister hnenah an thawn a ni.

Dr BD Chakma chu minister aṭanga bàn a nih loh avangin Joint NGO hruaitute August 18-a ṭhu­khawm chuan, bàn a nih leh nih loh August 25, 2017 thleng nghah a, bàn a nih loh chuan August 26-a inhmuhkhawm leh a, a ṭul dan azira kawngzawh leh total bandh huaihawtte an rel a ni.

Joint NGO chairman Lalbiak­zuala, Central YMA president chuan, Dr BD Chakma-a'n bànna a thehlut chu lawmawm an tih thu sawiin, "A bàn chhanah eng pawh ziak se, bànna a thehlut hrim hrim hi a lawmawm. Chakma a nih avang hrim hrima báng tur phût kan ni lo a, danpui kalha a chêt avangin báng turin kan duh a ni," a ti.

Joint NGO-in BD Chakma an puhnate
1) Kum 2014-a MZP-in CADC huam chhung, Borapansury khua Zofate Chawlhbuk an sak dawn ṭumin Dr BD Chakma hmalakna avangin MZP head­quarters, Lunglei hruaitute chhan leh vang awm loin Mizoram police-in an man.
2) MZP-in Borapansury-a Zofate Chawlhbuk an sak Chakma mipuiin an dodal chungchangah, Chakma NGO hrang hrangte'n Borapansury MDC eye-election an boycott-na tura inhmuhkhawmah BD Chakma hi rorel­naah a puipa berte zinga mi a ni.
3) Kum 2017-a Mizote quota-a MBBS leh BDS zir tur thlan chungchangah Chakma zirlai palite'n Mizote quota an chuhpuinaah zirlai pawlte'n an dodal tih hre rengin hma a la lui a, amah ngeiin police-te escort a dilpui a, Aizawl SP hnenah phone-in ngenna a thlen.
4) Dr BD Chakma hmalakna avangin Mizo leh Mizote an inpáwng beih chiam phah a, Mizoram police-ah pawh hliam na tak tuar an awm phah a, zirlai tam takin hliam an tawrh phah.
5) Hnam leh hnam inkara buaina thlen ṭhintu a ni.