MBBS seat titlem chhan hriat a ni lo ; Pek belh dil turin HTE Minister Delhi-ah

Higher & Technical Education (HTE) hotute chuan, sorkar laipuiin Central pool hnuaia Mizoram tana Bachelor of Medicine, Bachelor of Surgery (MBBS) seat a pek zat nikum aia kumina pariata a tihhniam chhan chu an hriat loh thu an sawi. Hetih lai hian HTE minister R Romawia leh secretary Benjamina te chuan MBBS seat pek belh tura sorkar laipui nawr tumin nimin khan New Delhi an pan.

Central pool hnuaia Mizoram tana MBBS seat pek zat hi kum 2016-17 khan 25 niin, kumin 2017-18 ah chuan 17 a ni a, pariatin a tlahniam a ni. Seat hmuh a tlakhniam chhan Vanglaini zawhna chhangin HTE hotute chuan, "A chhan kan hre lo. Kan Minister leh Secretary-te sorkar laipui dâwr turin an chhuk a, Union Minister leh Ministry hotute an dawr dawn a ni," an ti.

HTE department hotute chuan, kum 2017-18 atana MBBS leh Bachelor of Dental Surgery (BDS) seat Mizoram tana pek zat chungchang chu lehkhain an la dawn loh thu leh, Ministry website-a an hmuh chu tuna an hriat dan a nih rih thu an sawi.

Central pool hnuaia MBBS leh BDS zir tur kohna leh thlanna, counselling neih hun tur chungchangah HTE hotute chuan, Delhi-a thang mek HTE Minister leh Secretary-te thu an la ngaihchan thu leh, counselling neih ṭan hun tur an la sawi theih loh thu Vanglaini palai an hrilh a; muangchàn theih erawh a nih loh thu sawiin, "Supreme Court thu angin, zirlaite'n August 30 aia tlai loah admission an tih vek a ngai," an ti.

Hetih lai hian, North Eastern Council (NEC) hnuaia zir turte erawh chuan an zirna tur medical college-ah admission an ti deuh vek tawh a, zirlai pakhat erawh chuan admission a ti thei lo a, kuminah MBBS a zir thei dawn lo.

HTE Technical Wing hotute hnen aṭanga thu dawn danin, NEC hnuaia hian Mizoramin MBBS seat RIMS, Imphal-ah pasarih, NEIGRIHMS, Shillong-ah pathum, Agartala Government Medical College, Tripura-ah pahnih leh Assam Medical College, Dibrugarh-ah pakhat a nei a; BDS seat chu RIMS, Imphal-ah pali leh Regional Dental College, Guwahati-ah pathum a nei a ni.

RIMS, NEIGRIHMS leh Agartala Government Medical College-a zir turte chuan admission an ti vek tawh a; Assam Medical College, Dibrugarh-a zir tura thlan erawh chuan admission a ti thei lo a, kuminah MBBS a zir thei dawn lo. Assam Medical College-a Mizoram quota chu Assam Cabinet-in a lo paihsak tawh avang zir tura thlan zirlai chu kal mah se, admission an lo pe thei lo niin HTE Technical Wing hotute chuan an sawi.

Kum 2017-18 atana Mizoramin Central pool leh NEC hnuaia MBBS seat a neih zawng zawng chu 29 a ni ta a, BDS seat neih zat chu 10 a ni. Kum 2016-17 ah chuan MBBS-ah seat 38 leh BDS-ah seat 10 a ni.