Kan mal din dawn: Zorama

MNF president Zoramthanga chuan, an party chuan pawl dang an thawhpui dawn lo a, inthlanah a mal din dawn tih a puang a; MNF-in sorkarna a siam chuan zirna inah tihluihnaa Yoga inzirtir a nih loh tur thu a sawi.

Nimina Mizo Hnam Rûna inkhawmah thu sawiin Zoramthanga chuan, MNF chu BJP nena thawk dun tur anga sawi a ni ṭhin chu thu dik lo a ni tih a sawi a, "BJP kan thawhpui dawn lo a, a malin kan ding dawn a ni," a ti.

Kum 30 chhung deuh thaw party dang thawhpui tur leh thawhpuiin an buai tawh tih sawiin Zorama chuan, "Engtik lai mahin sorkar siam pawhin, siam loh pawhin tih fuh leh kal tluanpui a la awm thei lo. AMC-ah kan mal din a, kan chak ta tlat a, chuvangin, MNF High Command-in a lo rel thlûk tawh angin, MNF chuan tumah a thawhpui dawn lo a, a malin a ding dawn," a ti a; an mal dinna a hlawhtlin theih nan mipui puihna a ngen.

Zoramthanga chuan, National Democratic Alliance (NDA)-a Congress duh lo thawhhona leh NDA péng - North East Democratic Alliance (NEDA)-a thawhhona chu Congress party duh lote ṭanhona atana siam a nih thu a sawi a, "NDA chu Mizoram aṭangin MNF, ZNP leh MPC-te’n kan thawhpui a, NEDA-ah pawh chutiang tho chu a ni. Kan thawhhopui avang hian anmahniah kan va inchhûng ta a ni lo," a ti. NEDA-a thawhhona chu kohhran hrang hrangte Mizoram Kohhran Hruaitute Committee (MKHC)-a an thawhhona ang a nih thu a sawi.

MNF President chuan Yoga chungchang sawiin, "Pathian leh mipui zara MNF-in sorkarna a siam chuan sorkar zirna-in leh pisaa tihluihnaa Yoga inzirtir hi ṭha kan ti lo a, tihluihnain tumah a tihtir dawn lo," a ti.