Zirna kalphung thar tlangzarh a ni

India ram pumah elementary level-a zirna leh thiamna intluktlang leh inrualkhai zawk a awm theihna atan, Learning Outcomes (thiam ngei tur bituk) National Council of Educational Research & Training (NCERT)-in a duan chu nimin khan SCERT Auditorium-ah School Education minister H Rohluna'n a tlangzarh.

School Education Minister chuan Learning Outcomes pawimawhna sawiin, "Thiam tir tur bituk mai bakah, zirtir dan tur thlenga a huam tel avangin zirtirtute tan Learning Outcomes hi kawng kawhhmuhtu leh kaihruaitu pawimawh tak a nih bakah, nu leh pate tan pawh a ṭangkai dawn a ni. Nu leh pate'n an fate zir thiam tur an lo hriat ve nan ‘brochure’ sem turte hial buatsaih a ni," a ti.

H Rohluna chuan, 'Training of untrained teachers of ALL Elementary Schools’ chungchang sawiin, "RTE Act Section 23(2) Amendment chuan elementary school-a zirtirtute train theih hun March 31, 2019 thleng pawtsei tura rawtna a siam chu Parliament-in a pass a ni," a ti a; chu chuan zirtirtu training la nei lote tan training neihna hun ṭha a siam thu a sawi.

Parliamentary secretary (School Education) Joseph Lalhimpuia pawhin thu sawiin, tun hnaiah India rama zirnain hma a sawn theihna turin hmalakna tam tak a kal mek zel tih a sawi a, "India ram puma naupangte thiam chin inang lo lutuk a rualkhai theih zawk nan NCERT buatsaih Learning Outcomes kan hmang ṭan tur hi a ngaihṭhatthlak a, rah ṭha a chhuah ngei ka beisei," a ti.

Learning Outcomes hi elementary school zawng zawnga hman nghal a nih theih nan district tina DIET aṭangin principal leh faculty pali ṭheuhte tan District Resource Persons Training neih zui nghal a ni.