Organic thlaite international thlengin a market a awm dawn - Agriculture Minister

Nimin khan Agriculture conference hall-ah kut hnathawktu intêl khawm páwl pathumte hnenah organic certificate hlan a ni. Khuallian Agriculture minister C Lalrin­sanga chuan, organic hmanga thar thlaite chu international thlengin a market a awm tur thu a sawi.

Inkhawm hi Agriculture secretary Lalhmingthanga'n a kaihruai a; Agriculture Minister chuan, khawvel ṭhang zelah mihringte hriselna leh dam reina lam ngaih pawimawh a nih thu sawiin, "Mithiamte zir chianna aṭangin chemical hmanga thlai thar chhuahte hian hriselna a tichhe thei. Chuvangin, khawvelin organic zawngin ngaihtuahna a hmang," a ti.

C Lalrinsanga chuan, organic thlaite chu taksa hriselna mai ni lo, sumdawnna atan leh economy ṭhanna atan pawh a pawimawh thu sawiin, "Organic lama intlansiakna neih a nih mek laia Mizorama organic certificate dawng thei an awm hi méllung chhinchhiah tlak a ni," a ti a; organic certificate chu eng emaw vanga chân leh mai theih a nih avangin a dawngtute fimkhur turin a chah.

Agriculture Minister chuan, organic hmanga tharte chu chemical hmanga thar aiin a man to zawk tih sawiin, "Miin an lei to ngam hle. National mai ni lo, international thlengin a market a awm dawn. Market ṭha leh man man zawka hralh theihna tur a inhawng dawn a ni," a ti.

Khualzahawm Lalrintluanga Sailo, govt. dy chief whip chuan, ramhnuaia an awm lai aṭang tawhin MNF chuan organic hmanga thlai thar an kalpui ṭan tawh thu sawiin, "Organic chung­changah ngaihtuahna kan sêng nasa ṭhin hle," a ti a, organic uar chu ram hnuk, hriselna atana pawimawh a nih thu a sawi.

Organic certificate dawngtute chu - Reitlang Organic Producer Company, West Phaileng Block Bird Eye Chilli Grower Society leh MOVCD-NER Turmeric Grower Group, Kolasib an ni. Certificate hi enfiahna hrang hrang an paltlang hnuah Eco Cert, France-in an pek a ni.