ZNP&MPC-in Chakma candidate dawn lo

ZNP chuan nimin khan NGO Coordination Committee (Joint NGO) Chairman hnenah lehkha thawnin, kum 2018 Assembly inthlanah Chakma candidate an neih loh tur thu an hriattir. MPC party pawhin Chakma candidate an neih loh tur thu an puang bawk.

ZNP lehkha, secretary R Thangpuia hminga an thawnah hian, "In lehkha August 18, 2017 khan kan lo hmu a. Kan party-in PAC-ahte ngunthlûk takin ngaihtuahna kan nei nghal bawk a. In ngenna ang tak hian keini ZNP chuan 2018-a Assembly inthlan lo awm turah hian Chakma candidate khawi bialah mah dah lo turin thuthlukna kan siam nghal tih kan rawn hriattir a che," tiin an ziak a ni.

MPC office bearer-te nimina an pisaa senior vice president Vanlalhlana kaihhhruainaa ṭhukhawm chuan, "NGO Coordination Committee-in kum 2018 MLA general election awm turah Mizoram political party tinte Chakma candidate nei lo tura min ngen angin, MPC party OB meeting chuan kum 2018 MLA election awm turah Chakma candidate neih loh ni se kan ti," an ti.

MPC thuchhuah chuan, Brig. T Sailo kaih­hruai PC party a din tirh aṭang leh rorelna a chelh chhungin MLA-a Chakma candidate neih chu sawi loh, unit leh block pawh Chakma chennaah an din ngai lo niin a tarlang a; "Hei hi a chhan bulpui ber chu Chakmate huatna leh hnualsuat duh vang hrim hrim ni loin, kan ram leh hnam Chakma foreigner laka humhim tumna vanga hmalakna a ni," tiin a tarlang.