MBBS seat-ah sorkar a muthlu - Duhoma

ZNP president Lalduhoma chuan nimin khan an party pisaa inkhawmah thu a sawi a; Central pool-a MBBS seat pariata tihtlem a nih chungchang sawiin, Mizoram sorkar chu muthluah a puh.

Lalduhoma chuan, Central pool-a Mizoram MBBS quota pariata tihtlem a nih bakah, Mizoramin seat a channate chu medical college zinga ranking hniam tê tê deuh vek an nih thu a sawi a, "Hei hi na taka Central sorkara thlen vat âwm a nih laiin, kan sorkar chu lungpui chunga nghavawk theihnghilh ang maiin a ngawi leh ta vung vung mai. Muhil der ang maia auh harh theih loh sorkar kan hrawn hi vanduai kan inti a, an lakah hian beisei tur kan nei ta lo a ni," a ti.

MNF policy thar, SEDP chu chaw ṭhing her lum ang chauh a nih thu sawiin Duhoma chuan, "Inthlan hmasa daihah tawh khan, June 18, 2013-ah SEDP bu hi an President-in Vanapa Hall-ah a tlangzarh daih tawh a, Bung VII-na, 'Rahbi pawimawh turte' tih thupui hnuaia (7)-naah Rs. 3,00,000 leh a ṭul chuan a aia tam pawh pek an tum thu hi an lo puang daih tawh," a ti a; chu an policy chu party dang pahnih thawhpui chunga an tlakpui tawh a nih thu a sawi.

ZNP President chuan, Congress sorkar pawhin NEDP a kalpui a, beneficiary thlan chu Congress block, unit leh V/C-te kutah bawk a dah leh a, vote zawn nan an hmang leh mek niin a sawi a, "SEDP leh NEDP-te hi kum tam tak chhung an lo hlawhchhampui tawh leh an tihpuitlin duh tak tak lohte vek tho kha an ni," a ti.