Sorkar leh HPC(D) pêng pakhat inbe dawn

Mizoram sorkar leh Lalhmingthanga Sanate kaihhruai Hmar People Convention (Democrat)-te chu, August 2017 chhungin remna kawng zawngin an inbe dawn nia sawi a ni. HPC(D) thuchhuah chuan, inbiak remna kawng zawnga Mizoram sorkarin HPC(D) hotute kawm a tum chu lawmawm an tih thu a tarlang.

Nimina HPC(D) secretary (Info. & Publicity) John F Hmar Secretary thuchhuah chuan, "Mizoram Hmar issue rel fel tura HPC(D) leh Mizoram sorkar inbiakna kal mekah a hmáwrbàwkna fel tak leh ṭha tak a awm thuai theihna tura inbiakna neih leh hmaa Mizoram sorkarin Pu Lalhmingthanga leh a pawlte inhmuhpui a tum hi HPC(D) chuan lawmawm a ti a, Mizoram Hmar issue, mi tin pawm tlan theih inremna a awm ngei theina turin boruak ṭha tak hnuaiah inbiak tlanna nei ngei turin duhsakna kan hlan," a ti.

Thu dawn danin, H Zosangbera kaihhruai HPC(D) leh Mizoram sorkar inbiakna a kal mek a, HPC(D) phel leh lam, Lalhmingthanga Sanate kaihhruai nen pawha inbiakna neih a, inremna tluantling siam duhna a awm. Mizoram sorkar aiawhte chu Lalhmingthanga Sanate kaihhruai HPC(D) hruaitute nen thui tak an indawr tawh a ni.

Home department hotute hnen aṭanga thu dawnna chuan, Lalhmingthanga Sanate pawlte nena inbiakna hi tun August thlaah neih tumin an ruahmanna a, mahse, an nei thei ngei dawn em tih a la chian loh thu a sawi a; inbiakna an neih hunah pawh HPC(D)-te'n mutàn an siam lo tura an ngaih thu a sawi bawk.

Hetih lai hian, Mizoram sorkar leh H Zosangbera kaihhruai (HPC(D) inbiakna pawh a kal mek zel a; inbiakna hnuhnung berah an thu dahah, July 2017 thla kha inbiak leh hun tura tih ni mah se, tih tur dang a tam avangin inbiakna neih a ni lo. September 2017 chhungin inbiak chhunzawm beisei a ni.