KHAWTHLIR

Mizoram Rajya Sabha MP thar K Vanlalvena chu nimin khan Rajya Sabha House chamber, Delhi-ah rinawmna thu tiamtira lak luh a ni. K Vanlalvena rual hian state 20-a Rajya Sabha MP atana thlan thar mi 60-te lak luh an ni bawk.

NSS State Office chuan nimin khan Aizawl Civil Hospital blood bank-ah thisen pek rûnpui an buatsaih a, NSS volunteer mipa 37 leh hmei­chhia 12-te'n thisen unit 49 an pe. Synod HSS NSS-in unit 26, KM HSS-in unit 16 leh Republic HSS NSS-in unit sarih an pe a ni.

Commerce & Industries minister Dr R Lalthang­liana chuan, khawchhak lama lirnghing ṭhin zir chiang turin Geology & Mineral Resources joint director H Lalbiakkima a tír. H Lalbiakkima hian June 2020 khan Tuipuiral tlangdunga khua 28 tlawh chhuakin, lirnghingin chhiatna a thlente sor­karah report a lo pe tawh a; tun ṭumah hian vantlang hmunhma leh mimal harsatna tawhte chiang zawka zir a ni ang.

All Mizoram Poultry Farmers' Association hruaitute chuan July 21, Thawhlehni khan chief minister Zoramthanga an hmu a, an harsatnate an thlen. "CM hian kan harsatnate lo enfel tur leh a theih anga hmalak a tum thua min chhàn avang­in kan lawm hle. Ar vulhtute'n state páwn aṭanga ar lo lut ṭhin kan elpui theih nan artê leh ar chaw tlawm zawka kan hmuh theihna tura hma min lakpui a tum thu a sawite avangin kan lawm hle a ni," an ti.

State Referral Hospital-ah Covid-19 vei mi 20 enkawl mek a ni a, ICU-ah mi pahnih, SICU-ah mi pakhat leh Isolation Ward-ah mi 17 an awm. 

Congress party ṭhalaite chuan nimin khan Cong­ress Bhavan-ah Rajya Sabha MP aṭanga châwl ta Ronald Sapa Tlau thlahna hun an hmang. MPYCC president Dr Lalmalsawma'n thuchei hlànin, "Ṭhalaite min ngaihsaktu leh Zoram tana ngaihtuahna zawng zawng sengtu Pu Ronald Sapa'n a term a hmang zo thei hi kan lawmpui em em a, kan ui tak zet bawk a ni," a ti.

Nimin aṭang khan Vairengte paltlanga bungraw phur lirthei khalhtute swab sample lâk ṭan a ni. Vairengtea swab sample la tur hian Kolasib CMO pisa aṭangin sample collection team khat ruahman a ni a, nimin tlai dar 4 thleng khan Vairengte screening point-ah tank lorry driver 60-te chu Rapid Antigen Test kit hmanga endik niin, an negative vek a ni.

ZMC Covid-19 Laboratory-ah nimin khan mi 338-te swab sample endik a ni a, he thu ziah lai hian result a la chhuak lo. Sample-te chu State Referral Hospital-a awm sate bakah, Aizawl, Lawng­tlai leh Kolasib aṭanga an dawnte a ni.

Minister of state TJ Lalnuntluanga chuan lirnghing vanga harsatna tâwk East Tuipui biala khaw hrang hrangte nimin khan a fang chhunzawm. Minister hian Khuangthing, Zawlsei, Khawbung, Leithûm leh Khuangleng khuate tlawhin, Village Disaster Management Committee-te leh khawtlang hruaitute a kâwm a, chhawmdawlna thilpek an hlân. TJ Lalnuntluanga hian Thawhlehni khan khaw dang eng emaw zat a tlawh tawh a ni.