Congress hruaitute'n lirnghing tuarte tlawh

Congress party hruaitute chuan July 21-22, 2020 chhung khan Mizoram khawchhak lam, tun hnaia lirnghingin ṭum eng emaw zat a sâwi khaw hrang hrang an tlawh a, ṭanpuina pawisa Rs. 5,00,000 an hlàn.

July 21 khan Congress hruai­tute chuan lirnghingin a tih­chhiat vanga ṭhiah tâk Zokhawthar Presbyterian Kohhran biak-in an tlawh a, sak ṭhat lehna atan MLA Lalrindika Ralte-in Upa H Lalhminghlua hnenah Rs. 1,00,000 a hlân. MLA dang C Ngunlianchunga chuan, lirnghingin a tihchhiat vanga Zokhawthar biak-in ṭhiah lai social media-a an hmuhin an party hruaitute thinlung a ṭháwng hle tih sawiin, "Pathian biak-in meuh luah tlak loa a tlusawp hi kan rilru a na hle a ni," a ti.

Biak-in sak lehna atana an pawisa thawh chu tam lo mah se, Pathianin mal a sawm chuan thil ropui tak a tih theih an beisei thu sawiin C Ngunlianchunga chuan, "Sangha pahnih leh chhangpèr panga tipung theitu chuan kan sum tlemtê hi tipungin, a hma aia ṭha zawk biak-in din thar leh a ni ngei ang tih kan beisei," a ti a; lirnghing vanga khawchhak lam mipui manganna chu an lainat thu leh, a ṭul ang zela puih an inhuam thu a sawi. Lalrindika Ralte chuan, Pathianin mihringte chungah angkhatin ro a rel ṭhin tih sawiin, "Ama biakbûk pawh lirnghing hmangin a tichhe phal. Mahse, hei hian Zoram hmun hrang hranga kohhran mite thinlung hawngin, ṭanpuina eng emaw zat a luan luh phah a, kan mihringpuite an chan chhiat laia ṭanpui a, hmangaihna lantir hi mihringte mawhphurhna a ni," a ti.

Congress party hruaitute hian nimin khan Khawbung tlawhin, lirnghingin a tihchhiat in leh lote an en a; hripui léng vanga fimkhur a la ngaih avangin khaw tin tlawh vek a remchàn loh avangin Tuipuiral Group YMA hruaitute hnenah khaw hrang hranga mite tan Rs. 4,00,000 an hlàn a ni.