Quarantine-na senso sorkarin a tumsak thei tawh lo hi a mak - ZPM

Zoram Peoples' Move­ment (ZPM) chuan thu­chhuah siamin, qua­rantine centre-a awmte sênso sor­karin a tumsak thei tawh lo chu mak an tih thu leh, damdawi lama thawktute thil tihin mipui a barakhaih thu 

an tarlang.

ZPM chuan, July 20, 2020-a sorkar thu­chhuakah, phai lam aṭanga Mizoram rawn hawte chu quarantine-a an senso anmahni intum tawh tura tih a ni chuan mipui a barakhaih hle tih sawiin, "CMRF (Chief Minister's Relief Fund) leh Covid-19 puala sorkar laipui aṭanga ṭanpuina sum kan hmuh zozaite khan a daih ta lo nge, eng vanga sum leh paia harsatna tâwk ta nge kan nih tih hi Mizoram sorkar kan zâwt a ni," an ti.

State páwna Mizo tangkhangte tana Mizoram sorkarin sum sèn a hreh ta chu hriatthiam har an tih thu sawiin ZPM chuan, "Central aṭang­in Covid-19 dona atan sum kan dawn bakah, mi tlawmngai leh pawl ṭhenkhatte'n sum ṭha­hnem tham tak an thawh a, MLA-te pawhin an thawh a, sorkar hnathawkte hlawh thla thum chhung pûksak a ni bawk," an ti a; MNF party worker-te'n work order an hmu reng chunga sum harsatna nei ang maia sorkar a chê chu hriatthiam har an tih thu an sawi.

Sorkar thutlukna avangin quarantine pumpelh ru an awm theih thu leh community spread a thlen a hlauhawm thu sawiin ZPM chuan, "Test sènso thlenga mahni intum a ngai phei hi chu a mak lehzual hle. Test sènso mahni intum duh loh vanga test duh lo, lo vei ru reng an awm phei chuan mipui tan a him lo hle a ni," an ti. ZPM party chuan, doctor khung hran tur, swab sample test result nghak lai a lo inkhèl chuan mipui a barakhaih thu sawiin, "Sorkarin mipuite mahni ina tawm tura zan curfew min puan khum laia sorkar SOP bawhchhiaa zan lama inkhel hospital an lo awm mai khan mipui min barakhaih hle. Hetiang chuan mipui hian sorkar thu kan zâwm reng thei lo ang tih a hlauhawm hle a ni," an ti. Hemi chungchanga hma a lak zel dan tur mipui hriata puang turin Mizoram sorkar an phût a ni.