Minister aṭanga Dr BD Chakma Bânna CM Hawla'n a pawmsak

Chief minister Lal Thanhawla chuan, Dr Buddha Dhan Chakma-a'n minister of state a nihna aṭanga August 21, 2017-a bànna a thehluh chu a pawmsak a, a pawm thu hi Governor a hriattir tawh.

Chief Minister hian nimin chawhnu dar 2:30 khan a pisaah an party MLA leh hruaitute a kokhawm a; tlai dar 5 velah Dr BD Chakma bànna thehluh a pawm tih Governor hnenah a thawntir. He thu ziah lai thleng hian Chief Minister thu thlen hi Governor-in a pawm leh pawm loh a la hriat loh a, mahse, a pawm ngei tura ngaih a ni.

Vanglaini palai zawhna chhangin Chief Minister chuan, tun dinhmunah chuan minister dang lak luh belh emaw, portfolio tihdanglam tumna a neih hrih loh thu a sawi.

Lal Thanhawla chuan, Dr BD Chakma bànna a pawm chhan chu inen hranna vang a ni lo tih sawiin, "Mizorama dan dik taka Chakma awmte chu en hranna kan nei lo. Mizorama dan dik taka chengte chu sakhua leh hnam ngaihtuah loin ang khat vekin kan en a ni," a ti.

Tlawmngai pawl zingah Chak­ma enhrang an awm a nih pawhin a hriatpui lo tih sawiin CM Hawla chuan, "Ka kaihhruai sorkar chuan dan dik taka Mizorama awmte chu ang khat vekin a en a ni," a ti a; dan dik loa Mizorama Chakma awm, Mizo mipui chanvo chang vete erawh chu an en hran thu a sawi.

Dr BD Chakma hian Thawhṭan­ni chawhma dar 11:15 khan mi­nister of state aṭanga a bânna a thehlut a, Chief Minister aiawhin a Personal Secretary-in a dawng a ni.

Tarlan tawh angin, Dr BD Chakma chuan Chief Minister hnenah hian a ministry-a minister of state a nih reng chuan democracy ropuina Mizoramah vawnhim a nih reng theih loh a hlauh thu sawiin, "I kaihhruaina hnuaiah hian hnam leh sakhua thliar hrang lo a, kan in anga mipuite kan chen theih ka duh. Ngun tak ka ngaihtuah hnuin bànna hi ka rawn thehlut a ni," a ti a; a bànna chu pawm ngei turin Chief Minister hi a ngen a ni.

NGO Coordination Committee chuan Dr BD Chakma hi India Constitution hnuaia a tih tur ti lo leh a tih loh tawp tur tihah puhin, July 27, 2017 khan minister of state a nihna aṭanga bàn tura ngenna Chief Minister hnenah an thawn a ni.

Dr BD Chakma chu minister aṭanga bàn a nih loh avangin Joint NGO hruaitute August 18-a ṭhukhawm chuan, bàn a nih leh nih loh August 25, 2017 thleng nghah a, bàn a nih loh chuan August 26-a inhmuhkhawm leh a, a ṭul dan azira kawngzawh leh total bandh huaihawtte an rel a ni.