Bank-a thawkte'n lungawi lohna an lantir

India rama bank hna­thawk pawl pakua inzawm khawm, United Forum of Bank Unions (UFBU) chuan nimin khan India ram pumah lungawi lohna an lantir a, Mizoramah pawh public sector bank hrang hrangin an zawm.

UFBU-in lungawi lohna an lantir chhan hi Central Labour Commi­ssioner (CLC) nena an indawrna a hlawhchham vang a ni a; Mizoramah chuan UFBU Mizoram huaihawtin chawhma dar 10:30-ah State Bank of India (SBI) main office kawtah lungawi lohna lantir a ni.

Aizawla SBI main office kawta lungawi loh lantirnaa thu sawitu, SBI Staff Asso­ciation assistant general secretary C Zoliana chuan, bank hrang hrang sâwr têt leh suih fin an duh loh thu te, mipui bank (public sector bank)-te mimal bank-a thlakthleng an duh loh thu te, GST chuanlama hmanga service charge tihpun an duh loh thute a sawi a; mi hausate'n loan tam tak tak an lak vanga bank-a mirethei chan ái awm thei lo ṭha an tih loh thu sawiin, kum 2012 aṭanga kum 2016 thlenga bank aṭanga loan pûk, rulh lêt beiseiawm tawh lo cheng vbc. 249,925 a awm thu a sawi bawk.

UFBU hian thil phût 17 an nei a; chu'ng zingah chuan, sumdawng lian loan pûk thai bosak tumna duh lohna te, pawisa tihthih leh sorkar scheme hrang hrang tihhlawhtlin nana bank senso sorkarin a pek let te, pawisa tihthih kaihnawiha bank-a thawkte harsatna tawh chinfel thuai te, bank-a thawktu hrang hrang hmun ruak hnawhkhah thuaite a tel.