District pek kan nih hma chuan a tawp thlenga nawr kan tum - Darlawn

Darlawn District Demand Co­mmittee (DDDC) chuan, Darlawn chu district headquarters-a puan a nih hma chuan a tàwp thlenga an nawr zel tur thu nimin khan Aizawl Press Club-ah an puang.

DDDC chairman JMS Dawng­liana chuan, kum 1998 aṭangin Mizoram sorkarah district head­quarters atana Darlawn dah turin an thlen tawh tih sawiin, "Kum 20 dawn kan nghah hnuah pawh district thar pek kan ni lo hi hriatthiam harsa kan ti a, kan mangang tak zet a ni. Mizoram hmara lama cheng kan district demand area-a mite tan hian district thar siam hi a ṭul tak meuh a ni," a ti.

Darlawn tlangdung chu kawng hrang hrangah a hnufual hle nia sawiin JMS Dawngliana chuan, "Tlangdung angte anga hma kan sawn ve theihna tur awmchhun leh bulpui ber chu district thar neih hi a ni. Kan district-ah hian tharum thawhna a awm fo tawh avangin kan demand hi muanawm taka kalpui kan tum hram hram ṭhin," a ti a; Mizoram sorkar chu a rang thei ang bera district pe tura an ngen thu a sawi.

DDDC Chairman chuan, Aizawl district-ah mihring leh in ding a tam filawr tih sawiin, "Hei vang hian inrelbawlna lam enkawltute'n Aizawl leh a chhehvel khaw bul hnai tak tak an vil hneh lo a, inrelbawlnaah harsatna kan tawh phah nasa ṭhin hle. Sorkar hnathawkte'n Aizawla awm an tum ngar ngar a, office hrang hrangah post awm zat tur luah khah loin a awm reng ṭhin a ni," a ti.

JMS Dawngliana chuan, Aizawla mi lian leh neinung zawkte nen inelna hmachhawn ho a him lo nia sawiin, "Tuna kan district demand area chhung aṭang pawh hian hmasawnna duhin silai lek chhuakte pawh kan awm phah ta hial a ni," a ti a; tun ang zel a nih chuan Mizoramin remna leh muan­na kawng a zawh mek a derthâwn phah an hlauh thu a sawi.

DDMC hruaitute chuan, Mizo­ram GDP a ṭhan mek laiin an dis­trict demand area-a khuate chu an dinhmun a chhe hle niin an sawi a; Darlawn chu district headquarters phûtte zingah a âwm ber an nia sawiin, "Mizoram map han en ila, kan àwm ber tih a lang chiang," an ti.

Zawhna chhangin DDMC hruai­tute chuan, "District pek kan nih chuan ralthuam chelekna awmte pawh a reh theih kan beisei. Ralthuam chelek a, autonomous district council phûttute nen pawh indîpdâlna kan nei lo a, mi support zawk a ni," an ti a; Mizoram chhim lamah pawh ADC leh district head­quarters a awm kawp tho tih an sawi.

DDMC hruaitute chuan, district pe turin sorkar an phût tlat tih sawiin, "District thar kan neih hma chuan theihtawp chhuahin kan theih ang angin hma kan la zel dawn. A tawp thlenga nawr zel turin kan inpeih a ni," an ti.

Nimin khan chief minister Lal Thanhawla an hmuh thu sawiin DDMC hruaitute chuan, "Beidawn­na viau tur leh lawmna viau tur a awm lo. Kan MLA-te pawhin min thlawp viau," an ti a; bialtu MLA pawhin district headquarters pek kan duhnate CM a sawipui tawh niin an sawi.

DDMC hruaitute sawi danin, district atana an phût chin chu Tuivawl leh Chalfilh constituency-a khaw 41 a ni a, chu'ng khaw 41-ah chuan in 8,000 chuang awmin, mi 40,000 chuang an cheng. Darlawn district puang ta se, an demand area-a khuate zingah Darlawn district-a beh duh lo an awm lo niin an sawi a ni.