MBS-in PwD Commissioner atan Rualbanlote hmangaihtu an duh

Mizoram Blind Society (MBS) chuan thuchhuah siamin, Persons with Disabilities (PwD) Commissioner atan a tling leh tlak ngei an duh thu leh rualbanlote hmangaih tak taktu an duh thu an tarlang.

MBS tarlan danin, August 2, 2017-a sorkar thuchhuahin a tarlan angin, PwD Commissioner tura diltu zinga mi pathum qualified veka ngaihte sorkarin a chhawp chhuak a, an zinga pakhat, Dr Henry Zodinliana Pachuau chu August 10, 2017-ah appointment pek niin, August 16, 2017 ral hmain a pawmna lehkha sorkara thehlut tura tih a ni.

PwD Commissioner tura rawt chu Mizoram University-a zirtirtu hna thawk lai a ni a, PwD Commissioner hna chu a thawh loh tur thu MBS hruaitute August 17-ah a hrilh. Hei vang hian, panel list-a mi pahnih zinga tu emaw zawk zawk chu PwD Commissioner atan dah a ngai dawna ngaih a ni.

MBS chuan, PwD Commissioner atan mimal duh an nei lo tih sawiin, "Kan ngaih pawimawh leh duh ber chu, Mizoram sorkar­in PwD Commissioner recruitment rules fel tak ziak ngeiin a siam tawh a, RRS-in a sawi ang ngei qualification leh rualbanlote enkawlna kawnga a a taka ngeia kum 10 aia tlem lo experience nei tawh ngei appoint se kan duh ber a ni," an ti.

PwD Commissioner RR chu bawhchhe lo turin MBS chuan Mizoram sorkar an ngen a; "Rualbanlote thinlunga hmangaihna leh khawngaihna tak tak nei si lo a, hna, rank leh facility-te ît vang leh kaisan nan maia PwD Commissioner hna chelh tumte chu nakina mualphona lian zawk an pumpelh theih nan inhnûkdâwk ngam turin kan ngen a ni," tiin an tarlang.

Hetihlai hian, Person with Disability (PwD) commissioner atana diltute zinga thlan, Dr Henry Zodinliana Pachuau chuan PwD Commissioner hna chu a chelh leh duh loh avangin a pawm loh thu sorkarah a thlen tawh a; a aiah mi dang lak a ni dawn.

PwD Commissioner hna diltute zingah Dr Henry Zodinliana Pachuau hi thlan niin, he hna a zawm duh leh duh loh zawh a ni a, mahse, a pawm ta lo. A pawm loh chhan hi Mizoram University-a a hna chelh lai bànsan a ngaih dawn vang nia thu dawn a ni.

Mi dang pahnih chu PwD Commissioner diltu zinga thawk thei tura tih an la awm a, a tu emaw zawk zawk lak a nih rin a ni.