April-June chhungin TB vei mi 484 hmu

Nimin khan Chal­tlanga Tourist Lodge-ah kum April-June chhunga ngawr (TB ) enkawlna chungchang thlirletna, second quarter review meeting neih a ni a; April-June 2017 chhungin Mizoramah TB vei mi 484 hmuh chhuah a nih thu an tarlang.

Review meeting hi National Health Mission (NHM) mission director Dr Lalrozama'n a hmanpui a, state TB officer Dr Vanlalfela'n a kaihruai. September 2017 aṭanga TB vei zawng zawngte MDR-TB an vei leh vei loh enfiah vek a nih dan turte sawiho a ni.

Meeting-a tarlan dan­in, April-June 2017 chhung khan Mizoram pumah TB veia rinhlelh mi 1,870 enfiah niin, chu'ng zinga mi 484 chuan TB an vei tih hmuh chhuah a ni a; TB leh HIV vei kawp mi 19 hmuh chhuah a ni. MDR-TB vei hmuh chhuah zat chu mi 18 an ni a, TB vei enkawl dam zat chu 91% a ni.

Kum 2016 chhung khan Mizoramah TB vei mi 2,149 hmuh chhuah a ni a, kumin January-June chhung khan TB vei mi 943 hmuh chhuah an ni bawk.

Kumin July thla chhung khan district pa­nga - Aizawl, Mamit, Kolasib, Lawngtlai leh Siaha district-ahte TB hmuh chhuah beihpui (active case finding) neih a nih thu leh, chutah chuan mi 10,000 chuang endik zinga mi 11-in TB an vei tih hmuh chhuah a nih thu tarlan a ni.