GIS chungchang zirhona buatsaih
Mizoram Remote Sensing Application Centre (MIRSAC) leh Environmental Systems Research Institute (ESRI) ṭangkawp chuan, nimin khan Aijal Club-ah Global Information System (GIS) chungchang zirhona an buatsaih a, Planning minister Lalsawta'n a hmanpui.
Lalsawta chuan, tunlai khawvel ṭhang chak tak, thiamna nasa taka pung meka chengte an vannei tih sawiin, "Hmanlai mite neih ve loh remchanna tam tak kan neih hi hman tangkai kan zir a ṭul. GIS hi a hmang thiam apiang tana chhawrnahawm, kawng tinrenga hman ṭangkai theih, dan leh thupek kenkawhna kawngah te, hriselna, zirna, industry leh thil dang tam takah ruahmanna kimchang leh felfai siam theihna tura thil ṭangkai a ni," a ti.
ESRI, India senior vice president Asheet Makhija chuan, "GIS hi leilung leh a tuamtu zirchianna leh chhui zauna, lehkhabu leh map keu kher ngai loa IT hmanga awlsam taka hriat duh ang apiang lak chhuah theihna a ni. GIS hmang hian sorkar hmalaknah ruahmanna ṭha zawk siam turin a pui thei a ni," a ti a; GIS a information awmsa an hman dan azirin chhiatrupna lo thlen thulhah te, khawpui chei kawngah te, zirnaah te, inbiakpawhna leh inkalpawhna ṭha zawk siam kawngahte a puih thu a sawi.
Mizoramah hian ESRI nena thawk hoin GIS hmangtu eng emaw zat an awm a; chung zingah chuan Aizawl Municipal Corporation, Mizoram University, MIRSAC, Environment Forests & Climate Change department, Land Revenue & Settlement department leh a dangte an tel a ni.