EFL Cup-ah Newcastle inlan dawn
English Football League Cup second round chu khelh ṭan a ni leh tawh a, kumin aṭang hian inelna hming hi sponsor-tu hming chawiin Carabao Cup tih a ni.
Zanin dar 12:15 hian Newcastle United-in St James Park-ah Nottingham Forest an mikhual dawn a, Premier League club dang Huddersfield, Southampton, West Ham United leh Burnley te an inlan bawk ang.
Inelna second round hi nizan aṭang khan khelh ṭan a ni a, club 50 an inlan dawn. Premier League club 13 chu he round aṭang hian an inlan ṭan a, nikuma relegate club pahnih Hull City leh Middlesbrough te pawhin second round aṭang hian bul an ṭan bawk.
Europe inelna hmachhawn club pasarih Chelsea, Tottenham, Manchester City, Liverpool, Arsenal, Manchester United leh Everton te erawh third round aṭangin an inlan ṭan ang.
Season liam taa Championship champion Newcastle hian Premier League match hnih an khelh tawhah Tottenham Hotspur leh anmahni ang bawka kai thar Huddersfield te an hneh lo. Newcastle hian an match hnuhnung bera Huddersfield an hneh loh avangin anmahni ṭantute an lungawi lo.
Spanish manager Rafa Benitez tan Carabao Cup hi inrintawkna neih nan a pawimawh dawn a, Championship club Nottingham hi an hneh ngei a rinawm a, an beisei ang loh result an neih erawh chuan pressure an ngah sawt ang.
Zanin Inkhel Tur
Newcastle United 12:15 AM Nottingham Forest
Huddersfield Town 12:15 AM Rotherham United
Cheltenham Town 12:15 AM West Ham United
Southampton 12:15 AM Wolverhampton
Stoke City 12:30 AM Rochdale
Blackburn Rovers 12:30 AM Burnley