MBBS leh BDS zir tura thlante tan Counselling tih hun tur la chiang lo

24th August, 2017

Central pool hnuaia Mizoram quota-a MBBS leh BDS zirturte atana counselling buatsaih hun tur ruat fel a la ni lo a, tun kar chhung ngeia tih hman tum a ni. Hetih lai hian, sorkar laipui dawr tura kal Higher & Technical Education (HTE) minister R Romawia chuan Union Health Minister a hmu thei lo.

Higher & Technical Education (HTE) department hotute hnen aṭanga thu dawn danin, Central pool-a MBBS seat Mizoramin a hlohte hmuh let a nih leh theihna atana sorkar laipui hotute dawra kal HTE minister R Romawia chu vawiin hian Aizawl a rawn thleng dawn a; ani ho hian counselling buatsaih hun tur ruat a ni dawn.

Admission tih hun tur a hnaih tawh avangin tunkar chhung ngeia counselling hi neih tum a ni. Central pool hnuaia Mizoramin MBBS leh BDS-a quota a neihna college-ahte chuan August 31, 2017 thleng admission tih theih a ni.

Hetih lai hian, HTE department hotute chuan, August 31 chu admission tih hun tawp thleng ni mah se, kum dangah pawh eng emaw vanga pawhsei a nih ṭhin thu an sawi thung.

Zawhna chhangin HTE hotute chuan, seat hmuh belh leh tura thuneitute'n hma an lak avangin chumi ngaichâng chuan counselling an la ti lo tih an sawi a, "Seat hi pek belh kan nih loh chuan merit list-ah counselling tura koh an ni ang a, kum hmasa anga seat ruahman ni mah se, seat kan neih tlem tak avangin seat chang lo an awm a ngai dawn a ni," an ti.

Mizoram hian central pool hnuaiah kum 2016-17 khan MBBS-ah seat 25 leh BDS-ah seat panga a nei a, kum 2017-18 ah chuan MBBS ah seat 17 leh BDS-ah seat pathum a nei dawn a ni.

Central pool-a Mizoramin MBBS seat a neih tihtlem a nih vanga seat tipung leh tura sorkar laipui dawra kal HTE minister R Romawia leh secretary Benjamina te chuan Thawhlehni khan Union Health Minister hmuh an tum a, mahse, a zin avangin an hmu thei lo.

HTE Minister leh Secretary hian Thawhlehni leh nimin khan Health & family Welfare ministry-a hotu dangte hmuin, Mizoram tana MBBS seat pek zat tipung leh turin an ngen nia thu dawn a ni a; mahse, he thu ziah lai thleng hian an hlawhtlin dan hriat a la ni lo.