Citizenship Amendment Bill chungchangah MPC President-in memorandum a thehlut

MPC president Lal­hmangaiha Sailo chuan, an party-in Citizenship Amendment Bill, 2016 chungchanga memorandum an siam chu nimin khan Bill ngaihtuah mektu Joint Parliamentary Committee (JPC) chairman Satyapal Singh, MP pisaah a thehlut.

MPC party thuchhuah tarlan danin, MPC hian August 7, 2017-a office bearer meeting an neih ṭumin, Citizenship Amandment Bill, 2016 chungchangah New Delhi-ah memorandum thehluh an rel a; an thurel bawhzui chuan an President chu a hmunah kalin memorandum chu a thehlut a ni.

Lalhmangaiha Sailo chuan, Joint Parliamentary Committee (JPC)-in India hmarchhak state hrang hrangah Citizenship Amandment Bill kaihhnawih thilah spot verification neia kal tura ruahmanna an neihah Mizoram a tel ve lo chu an hriatthiam loh thu a hrilh a; Mizoramah rawn kal ve ngei tur leh Mizoram ngaihdan la ngei turin a phût a ni.

MPC party chuan, an Presi­dent ngenna leh phût chu JPC Chairman pawhin a lo beng­khawn hle niin an tarlang a; "Hetih rual hian, MPC chuan JPC-in Mizoram an rawn tlawh ve ngeina turin na taka sorkar laipuiah aw nei turin Mizoram sorkar kan phût a ni," an ti.