Train lote zirtirtu ni thei tawh dawn lo

SCERT Director chuan thuchhuah siamin, Right to Education (RTE), 2009 Section 33 (2) Amendment-in a phût angin, March 2019 hmaa elementary school (primary leh middle school) zirtirtu, train lote'n zirtirtu hna an thawh zawm theih tawh loh tur thu a tarlang.

SCERT Director tarlan danin, hun tiam chhunga zirtirtu train lote chu zirtirtu hna thawh phah a nih tawh loh avangin, la train lo zawng zawngte chu September 15, 2017 hma ngeiin D.EI.Ed (ODL) course atan www.nios.ac.in ah in register vek tur a ni. Class XII-a 45% hmu pha lo chuan National Institute of Open Schooling NIOS)-ah improvement ti tura in register tel tur a ni bawk.

School Education enkawltu parliamentary secretary Joseph Lal­himpuia pawhin elementary school-a zirtirtu train vek a ngaih tawh tur thu hi a tarlang a; March 2019-ah chuan zirtirtu train vek an ni tawh tur a ni tih hian sorkar sikulte bakah, kohhran sikul leh mimal (private) sikul zawng zawng pawh a huam thu a tarlang.

Joseph Lalhimpuia tarlan danin, zirtirtu trai­ning la nei lote training hun chhung tur chu thla 18 a ni a, chumi chhungah chuan semester khatah contact programme ni 12 zel a awm dawn.

NIOS-a improve-ment tih tur chu September 15 hmain tih vek tur a ni. Zirtirtu zawng zawng te chu ID siam tur niin, chu chu Aadhaar card nen thlun zawm (link) tur a ni bawk.