BJP FIR thehluh PWD-in an sawifiah

Mizoram PWD chuan thuchhuah siamin, kum 2015-16 inkara Aizawl Road South Division huam chhunga retaining wall hmun 25-a siamah thil dik lo a awm nia hriaa Mizoram BJP Vigilance Cell-in Anti Corruption Bureau (ACB)-a FIR an thehluh chunchangah an sawifiah.

PWD tarlan danin, Mizoram BJP-te'n Aizawl Road South Division huam chhunga hmun 25-a retaining wall siamah thil dik lo a awm nia an hriat avangin August 3, 2017-ah RTI Act hmangin zawhna an thehlut a; PWD Aizawl Road South Division-in August 8 khan retaining wall siamna hmun 25-te leh hna thawhna atana sum senso zatte tarlangin, RTI Act hmanga Mizoram BJP Vigilance Cell zawhna chhanna a pe a ni.

BJP-in retaining wall siamte hmu loa insawia FIR an thehlut chu pawi an tih thu tarlangin Mizoram PWD chuan, "Heng retaining wall siamte hi a hmunah enho tura Aizawl Road South Division hotute sawmna BJP-in a pawm duh tak loh avangin, mimal leh pawl, chanchinbumi te, a duh apiangin retaining wall-te hi a hmunah ngei en theih a ni," an ti.