KHAWTHLIR
DC-in hawng
Aizawl DC Kannan Gopinathan chuan nimin khan DC conference hall thar, Election branch-a Voters Facilitation Centre leh DC office Library chei ṭhat a hawng. Facilitation Centre aṭang hian DC office huam chhunga branch hrang hranga kal kual a, rei tak tak nghah buai ngai tawh loin, tribal certificate, Aadhaar leh certificate dangte a lak chhuah theih a; pisa dawrtu mipui tan free wifi dah a ni bawk.
Darzo lei khâr
Hnahthial leh Darzo inkara lei, Darzokai lei, jeepable suspension bridge chu enfiah a ni dawn a; hei vang hian lei hi August 22, Thawhlehni aṭang khan khar niin, hun eng emaw ti chhung chu khâr rih a ni dawn. Lei hi a dawhtu contractor, S Guha Niyogi & Associate, Kolkata engineer-te'n an enfiah dawn a ni.
Tanpuina sem
AH&Vety department chuan nimin khan Lungleia an conference hall-ah NLUP - NEDP convergence hnuaia trade pathum - bawng vulh, ar vulh leh vawk vulh thlangtu mi 78 hnenah ṭanpuina Rs. 30,28,580 an sem a, Lunglei DC Lalzarmawii'n a hmanpui.
Gas man
Legal Metrology enforcement staff, Serchhip chuan nimin khan MIZOFED Serchhipa dah tur gas bur buk tlinglo bur 29 an man. Gas bur buk tling lote hi Legal Metrology Act 2009, Sec.30 na hmanga manin, hremna chu a ṭul anga ngaihtuah chhunzawm tura dah a ni a, gas phurtu motor Mz 06-5488 hi Serchhip chhuahsan rih lo turin an hriattir.
Siaha-ah training
Siaha District Child Protection Unit chuan, nimin khan an pisaah Youth Volunteer for Child Protection-te tan 'Sensitization Meeting of Youth Volunteer for Child Protection' an buatsaih. Training zawhah youth volunteer-te chuan Observation Home an tlawh nghal a ni.