New India Movement an zirho
DRDA leh Krishi Vigyan Kendra (KVK) ṭangkawp buatsaihin Thawhlehni leh nimin khan Lunglei, Champhai, Serchhip leh Lawngtlaiah sorkar laipui hmalakna thar, New India Movement zirhona buatsaih a ni.
New India Movement hi Lungleiah chuan Cultural Heritage Centre-ah hman a ni a, an hun hmanpuitu minister PC Lalthanliana chuan India ram hmel thar siam tur chuan hnam hrang hrang leh sakhaw hrang hrang te zalen taka an awmho tlan theih a pawimawh hmasa ber tih sawiin, khawtlang hruaitu VC kalkhawmte chu mipui dinhmun hrechiang ber tu leh mipuite ngheng hnai ber tu an nih avangin ram hmasawnna kawngah leh remna leh muanna humhalh kawnga an pawimawh zia leh an mawhphurhna a san zia hre nawn fo ṭhin turin a chah.
Champhaiah chuan New India Movement hi parliamentary secretary TT Zothansanga hoin Venglai community hall-ah zirho a ni. TT Zothansanga chuan sorkar hmalakna thar chu a pawimawh thu sawiin, "Retheihna leh chi inthliarna tibo a, faina leh kut hnathawkte lak luh tihpunna kawnga hma kan sawn theihnan mahni khawtuala hmalak ṭheuh a pawimawh," a ti.
TT Zothansanga chuan, Mizo ram leh hnam vei dan kawngah ngaituahna fím hman a ṭul thu sawiin, "A haw haw zawnga hma la lo a, thiamna leh finna kawnga theihtawp chhuah hi kan ram leh hnam himna tur a ni," a ti.
Serchhipah chuan New India Movement hi zirhona hi an district chhunga village council member-te tan buatsaih a ni a, Vanlalawmpuii Chawngthu, MLA-in a hmanpui.
Vanlalawmpuii chuan, ram ṭha zawk, nuam zawk leh hausa zawk din turin mitinin mawhphurhna an nei tih sawiin, "India thar din tura hmalakna chi hrang hrang, faina te, retheihna laka fihlim te, hlemhletna laka fihlim te, firfiaka chetna, sakhaw inlakbingna leh chi inthliarna lam chi umbo kawngah vawiina kalkhawm VC member-te chu mahni khua theuhva mite zirtirtu, a taka thawktu tur an ni," a ti.
Inkhawm hi DRDA project director VL Remliana'n kaihruaiin, kalkhawmten sawihona hun an hmang nghal a, hmalakna tur hrang hrang an rel a ni.
Lawngtlaiah chuan Thawhlehni khan Lawngtlai III-a CYLA Hall-ah New India Movement zirho a ni a, parliamentary secretary H Zothangliana'n a hmanpui.
H Zothangliana chuan, sorkarin kum nga chhunga ram hmasawnna chak zawka kaltir a, kut hnathawktute thar chhuah a leta tipung a, India ram thar (New India) din turin hma a lak thu a sawi a, "A hlawhtlin nan ram hruaitu te, saorkar hnathawkte leh kut hnathawktute’n mawhphurhna kan nei ṭheuh a ni," a ti.
Ramin hma a sawn tak tak dawn chuan kut hnathawktute’n hma an sawn phawt a ngai tih sawiin Zothangliana chuan, "Sorkar hmalakna leh ṭhahnemngaihna kan ṭâwmpui phak loh ṭhin avangin hma kan sawn chak thei lo fo," a ti a; kum 2022-ah chuan kut hnathawktute lak luh a lêta tihpun tum a nih thu a sawi.
New India Movement hi kum 1942-a India ram zalenna sualtute’n Quit India Movement an huaihawt leh a hnu kum ngaa India ramin zalenna a neih tak dan hre rengin, Quit India Movement kum 75-na, kum 2017 aṭanga kum nga chhungin retheihna, hlemhletna, rawlrála chetna leh chi inthliarnate awm lohna ram, ram fai leh thianghlima India ram thar din chhuak tura sawrkar laipuiin a ruahman a ni.