ODF district nih dan tur ngaihtuah

Lawngtlai District Wa­ter & Sanitation Com­­mittee (LDWSC) chu nimin khan an chairman Dr A Muthamma, Lawng­tlai DC hoin DC confe­rence hall-ah an ṭhukhawm a; an district chu inthiarna mumal nei lo awm lohna, open defecation free (ODF)-a puan a nih theih dan tur an ngaihtuah.

Lawngtlai DC chuan, ODF ni thei tura Lawng­tlai district siam turin tih tur tam tak a la awm tih a sawi a, "Tuna hma­chhawp awmte hi theihtawp chhuaha a hlawhtlin theih nana bawhzui a ngai. In tinin inthiarna ṭha leh tui thianghlim hnianghnâr tak an neih a ngai a, khaw eng emaw zatah mipui tan public water point-ah te, bual-in leh inthiarna tur sak a la ngai a ni," a ti.

PHE chief engineer C Lallunghnema chuan, ODF ni tura hmalaknaah India rama state zingah Mizoram chu 18-na a nih thu sawiin, "Mizorama district pariat zingah Lawngtlai hi a mawngphahah a la awm a, nasa zawka ṭan lak a ngai," a ti a; ODF ni thei tura hmalakna chu department pakhat hmalaknaa hlawhtling mai chi a ni loh avangin ṭanrual a ngaih thu a sawi.

Meeting-ah hian, Lawngtlai district-a khaw kilkhawr leh hnufual zualte chu Swacchh Bha­rat Mission (Gramin) leh hmun dang aṭanga inthiarna in saksak ngawt piah lamah, a hman dan leh enkawl zui dan zirtir an ngai hle tih an sawi a; zun leh êk thlahdah vanga hriselnain a tawrh theih dante pawh mipui hnena zirtir tel zel a ṭul thu an sawi bawk.

Lawngtlai district-ah hian SBM(G) hnuaiah tun thlengin ek-in 1,974 sak a ni tawh a; sak mek 162 a awmin, kum 2017-18 chhungin ek-in (IHHL) 4,000 sak hman tum a ni.