Naupang vâkvaite ṭanpui beihpui thlak a ni

Social Welfare department, Serchhip District Child Protection Unit leh Serchhip SP ṭangkawp buatsaihin nimin khan Serchiip SP pisa conference hall-ah naupang bo leh vakvaite ṭanpui beihpui thlakna, Operation Muskaan-III buatsaih a ni.

Khuallian, Serchhip additional SP Lalmuanpuia chuan, sorkarin naupangte chu chhungkuaah ṭha takin sei lian se, khua leh tui ṭha tak ni vek se a duh tih sawiin, "Chumi atan chuan Operation Muskaan hi buatsaih a ni," a ti a; sorkarin ram tana ṭha tura ruahmanna a siam chu ṭha taka bawhzuitu leh tihlawhtlingtu ni ngei turin kalkhawmte a chah.

Serchhip DCPO Lalsiampuii pawhin thu sawiin, operation neih dan turte leh Juvenile Justice (Care and Protection of Children) Act, 2015 chungchangah a sawifiah.

Training zawhah hian bus stand, auto-rickshaw stand, hotel hrang hrang, taxi stand leh Child Care Instruction-te an tlawh a, naupang bo leh vâkrawlài an awm em tih an enkual a ni.