Sairangah tuilian tuarte ṭanpuina pe

Aizawl West-I bialtu MLA K Sangṭhuama chuan a bial chhung, Sairang khuaa July thla tir lama tuilian tuar­tu chhungkaw 238 hnenah August 22, Thawhlehni khan ṭanpuina pawisa a sem. Ṭanpuina pawisa hi MLA fund aṭanga sem a ni a, semna inkhawm chu Sairang community hall-ah buatsaih a ni.

K Sangṭhuama chuan, tuilian vanga chhiat tâwkte chhawmdawlna tur ṭanpuina sem kawngah Mizoram sorkarin a tih tur chu a tih zel a beisei thu a sawi a, "Duh angin hma a la chak tâwk lo niin a lang a, engtiang takin nge chhiat tâwkte chhawmdawl a tum tih beiseina sang tak nen kan thlir mek a, tun dinhmunah chuan kohhran leh tlawm­ngai pawlte hmalakna chauh hmuh tur a la awm a ni," a ti.

K Sangṭhuama'n a MLA fund aṭanga tuilian tuar­te chhawmdawlna a pek chhuah hi Rs. 5,00,000 a ni a, Sairanga chhungkaw 120, Sairang Dinthara chhungkaw 100 leh Sihhmuia chhungkaw 18 hnenah a sem a ni.