Mihring phur chi sumdawnna lirtheiah Anti tobacco sticker târtir a ni

Aizawl Traffic Police leh Mizoram State Tobacco Control Society (MSTCS) hnuaia Aizawl district Anti Tobacco Squad (ATS)-te chuan, nimin khan mihring phur chi sumdawnna lirtheia tàr tur, vaihlo ṭhat lohna thu ziak (sticker) an sem.

Traffic Police leh Aizawl ATS-te hian taxi leh maxicab service eng emaw zatah vaihlo ṭhat lohzia inziahna stricker an tár a; driver-te'n an tàr turin sticker ṭhahnem tak an pe bawk. Traffic Police-te chuan sticker sem hna hi ni hnih chhung an lo buaipui tawh a ni.

He hmalakna hi TATA Trust hnuaia Center for Micro-Finance and Livelihood (CML) kaltlanga North East Initiative Development Agency (NEIDA)-in ṭanpuina sum an pek hmanga kalpui a ni a; COTPA dan tlawhchhana siam, sumdawnna lirtheia tàr tur sticker hi July 18, 2017 khan DGP Thiang­hlima Pachuau-in a lo tlangzarh tawh a ni.

MSTCS hotute sawi danin, COTPA dan hnuaiah vaihlo ṭhat lohzia inziahna sticker-te chu mihring phur chi sumdawnna lirtheiah bel ngei tur a ni a, bel lote chu hrem theih an ni.

Sticker bel leh bel loh chung­changah hian Traffic Police chuan khawng takin dan an kengkawh dawn a, dan bawhchhiate chu man zel an nih tawh tur thu an sawi. Niminah pawh COTPA Section 4 bawhchhia mi pakhat man a nih thu an tarlang.