CIJWS-a awmte sample endik a ni

Kolasib district-a sorkar thuneitute leh Counter Insurgency and Jungle Warfare School (CIJWS), Vairengte ṭang dun hmalaknain CIJWS-a thawkte leh sipai, Mizoram páwn aṭanga lut khung hran mekte dinhmun enfiah a ni.

Endik tur hian Kolasib Chief Medical Officers’ (CMO) pisa aṭangin team pahnih an thawk chhuak a, CIJWS-a medical officer Maj. Dr Sonakshi leh a hote'n an lo pui a ni. CIJWS quarantine facility-ah hian mi 17 awm mekin, Lailapur-a an qua­rantine facility-ah mi 79 an awm mek a, an vaiin mi 96 an awm. Khung hran mek zawng zawng chu Rapid Antigen Test kit hmanga endik an ni a; medical team-te'n ṭul an tih angin RT-PCR hmanga endik turin swab sample lâk a ni bawk.

CIJWS-ah hian June 3, 2020 aṭangin sipai lut tharte an khung hrang ṭan a, sipai ni lo, a hmuna thawk mi dangte chu April thla aṭangin ni 21 chhung an khung hran ṭan bawk. Khung hrante chu uluk takin enkawl an ni a, Co­vid-19 veia rinhlelhte chu Masimpur-a Military Hospital-ah an dah ṭhin. Indian Council of Medical Research thurâwn leh Zoram Medical College (ZMC) Standard Operating Procedure (SOP) angin, Rapid Antigen Test kit hmanga Covid-19 vei hmuh chhuahte chu a dik ngei (true positive)-a ngaih a ni a, RT-PCR hmanga endik nawn a ṭul lo tih, sorkar thuchhuah chuan a tarlang.