Mizoram leh Assam-te'n state ramria ram an hauh chin a hmuna enfiah rél
Mizoram State Boundary Committee chu an chairman Tawnluia, deputy chief minister kaihhruaiin nimin khan Forensic Science Laboratory conference hall-ah an ṭhukhawm a, ṭhutkhawm vawi lina a ni. State pahnihte'n ram an hauh chin ve ve hmunte endik turin joint verification neih an rél.
Ṭhutkhawmah hian sorkar aṭangin Home minister Lalchamliana, FCSCA minister K Lalrinliana, Land Revenue & Settlement minister Lalruatkima, Environment, Forest and Climate Change minister TJ Lalnuntluanga, chief secretary mawhphurhna la mektu Manisha Saxena, DGP Devesh Chandra Srivastava, Home department hotute leh Kolasib leh Mamit district bawrhsapte an tel.
Committee member dang - MNF, ZPM, MZP, MHIP, MUP, JAC on ILRFD aiawh te, ramri chungchanga mithiam sawm bikte an tel bawk.
Sorkar thuchhuah tarlan danin, ṭhutkhawma tel pawl leh political party hrang hrang aiawhte'n ramri buaina chinfel a nih a, inremna neih thuai an duh tawh thu an sawi a ni.
Mizoram leh Assam ramri chinfelna tura Boundary Committee-in an buatsaih Approach Paper chu October 2022-a state pahnih aiawhte inbiak hunah Mizoram aiawhte'n ṭan chhan atan hmang se an ti a; state pahnihte'n ram an hauh chin ve ve hmunte endik turin joint verification neih an rél bawk.
Ṭhutkhawma tarlan danin, August 9, 2022-a state pahnih aiawhte thuchhuah inṭâwm (joint statement) bawhzuiin August 24, 2022 khan Kolasib, Mamit, Cachar, Karimganj leh Hailakandi DC-te chu Vairengtea CRPF camp-ah an inkâwm a; October 2022-ah state level inbiakna neih a nih hnuah inbiak chhunzawm zel tum a ni.
Boundary Committee ṭhutkhawm hnuhnung ber, November 17, 2021 hnuah state pahnihte'n minister level virtual meeting vawi thum an nei tawh. Committee ṭhutkhawm hmasa ber chu July 30, 2021 khan neih a ni a, September 7, 2021 leh November 17, 2021 khan neih a ni bawk.